इटहरी : जिल्ला प्रहरी कार्यालय सुनसरी तथा मातहतका प्रहरी इकाइहरूले अदालत तथा प्रशासन कार्यालयका फैसला कार्यान्वयनलाई प्रभावकारी बनाउने अभियानअन्तर्गत विभिन्न मुद्दाका ११ जना फरार प्रतिवादीलाई पक्राउ गरेका छन्।
प्रहरी टोलीले जिल्ला अदालत सुनसरी र जिल्ला प्रशासन कार्यालय सुनसरीबाट विभिन्न मितिमा दोषी ठहर भई फरार रहेका प्रतिवादीहरूलाई पक्राउ गरेको हो।
पक्राउ परेकामध्ये अभद्र व्यवहार, चेक अनादर, घरेलु हिंसा, अंश चलन तथा चोरी मुद्दाका प्रतिवादी रहेका छन्। उनीहरूबाट कुल २९ हजार एक सय ५५ जरिवाना असुल हुन बाँकी रहेको प्रहरीले जनाएको छ। साथै चोरी मुद्दाका एक प्रतिवादीले ६५ दिन कैदसमेत भुक्तान गर्न बाँकी रहेको खुलेको छ।
प्रहरीका अनुसार पक्राउ परेकामध्ये हरिनगराका शजात खान, इनरुवाका मो. ताहिर मियाँ, धरानका नकुल घले गुरुङ र रूस्मा राई, बर्जुका इन्द्रकान्त राय, उमाकान्त राय, भागोदेवी राय, लक्ष्मीकान्त राय र विष्णुकान्त राय तथा इटहरीका राजकुमार बस्कोटा रहेका छन्।
जिल्ला प्रहरी कार्यालय सुनसरीले अदालतका फैसला कार्यान्वयनलाई प्रभावकारी बनाउँदै कानुनी शासनको प्रत्याभूति दिलाउन फरार प्रतिवादी पक्राउ अभियानलाई निरन्तरता दिइने जनाएको छ।
Discussion about this post