विराटनगर : कोशी प्रदेशमा पर्यटकको सुरक्षा, संरक्षण र सहजीकरणलाई प्रभावकारी बनाउन सातदिने ‘पर्यटक प्रहरी अनुशिक्षण’ तालिम सुरु गरिएको छ।
प्रदेश प्रहरी कार्यालय विराटनगरले आयोजना गरेको तालिमको प्रहरी वरिष्ठ उपरीक्षक योगेन्द्र सिंह थापाले उद्घाटन गरेका हुन्। तालिममा जुनियर प्रहरी अधिकृतसहित ३० जना प्रहरी कर्मचारी सहभागी छन्।
उद्घाटन कार्यक्रममा एसएसपी थापाले नेपाल प्राकृतिक, सांस्कृतिक तथा धार्मिक विविधताले सम्पन्न मुलुक भएकाले स्वदेशी तथा विदेशी पर्यटकलाई सुरक्षित, सहज र सकारात्मक अनुभव दिलाउन पर्यटक प्रहरीको भूमिका महत्वपूर्ण रहेको बताए।
उनले तालिमबाट प्राप्त ज्ञान, सीप र अनुभवलाई कार्यक्षेत्रमा प्रभावकारी रूपमा प्रयोग गर्न सहभागीलाई निर्देशन दिए।
कोशी प्रदेश सरकारको पर्यटन, वन तथा वातावरण मन्त्रालयका उपसचिव कृष्णकुमार न्यौपानेले आर्थिक वर्ष २०८३।८४ लाई ‘पर्यटन वर्ष’ का रूपमा मनाउने प्रदेश सरकारको लक्ष्यअनुसार पर्यटक प्रहरीको क्षमता अभिवृद्धि र व्यावसायिक दक्षता विकासका लागि तालिम सञ्चालन गरिएको बताए।
प्रदेशका प्रमुख पर्यटकीय गन्तव्यहरूलाई सुरक्षित, व्यवस्थित र पर्यटकमैत्री बनाउन तालिमले सहयोग पुग्ने अपेक्षा गरिएको प्रहरीले जनाएको छ।
Discussion about this post