यही असार २७ गते हुने इटहरी उद्योग वाणिज्य संघको निर्वाचनलाई लक्षित गर्दै सदस्य पदका उम्मेदवार दिनेश धमलासँग वर्तमान व्यावसायिक वातावरण, उद्योगी–व्यवसायीले भोगिरहेका चुनौती, उद्योग वाणिज्य संघको भूमिका तथा निर्वाचित भए कार्यान्वयन गर्ने प्राथमिकताबारे गरिएको कुराकानीको सम्पादित अंश :-
१. सर्वप्रथम आफ्नो व्यक्तिगत तथा व्यवसायिक पृष्ठभूमिबारे बताइदिनुहोस् न ?
मेरो जन्म ओखलढुंगा जिल्लाको सिद्धिचरण नगरपालिका (साबिक बेतिनी गाविस)मा भएको हो। हाल इटहरी–६ मा बसोबास गर्दै जुत्ता–चप्पल व्यवसायमा सक्रिय छु। लामो समयदेखि यस क्षेत्रमा काम गर्दै आएको छु। व्यवसायलाई आम्दानीको माध्यम मात्र नभई समाज र व्यवसायीको सेवासँग जोडिएको जिम्मेवारीका रूपमा लिएको छु।
२. उद्योग वाणिज्य संघसँग तपाईंको सम्बन्ध कहिलेदेखिको हो ?
उद्योग वाणिज्य संघसँग मेरो सम्बन्ध धेरै वर्षदेखिको छ। सामान्य सदस्यका रूपमा संघका गतिविधिमा सहभागी हुँदै आएको छु। औपचारिक जिम्मेवारी सम्हाल्ने अवसर भने पाएको छैन। यसपटक व्यवसायीको आवाज प्रत्यक्ष रूपमा उठाउने उद्देश्यले सदस्य पदमा उम्मेदवारी दिएको हुँ।
३. चुनाव लड्न प्रेरित गर्ने मुख्य कारण के हो ?
व्यवसायी साथीहरूले भोगिरहेका समस्या नजिकबाट देखेको छु। ती समस्याको समाधानका लागि जिम्मेवारीपूर्वक काम गर्नुपर्छ भन्ने सोचले चुनावमा होमिएको हुँ। म पदका लागि होइन, कामका लागि उम्मेदवार बनेको हुँ।
४. निर्वाचित हुनुभयो भने पहिलो प्राथमिकता के हुनेछ ?
व्यवसायीका समस्या सम्बन्धित निकायसम्म प्रभावकारी रूपमा पुर्याउने, व्यवसायमैत्री वातावरण निर्माणका लागि पहल गर्ने र उद्योग वाणिज्य संघलाई सबै व्यवसायीको साझा तथा सक्रिय संस्था बनाउने मेरो पहिलो प्राथमिकता हुनेछ।
५. अहिले इटहरीका व्यवसायीले भोगिरहेका मुख्य समस्या के हुन् ?
बजार मन्दी, घट्दो कारोबार, बैंकको ब्याजदर, करसम्बन्धी जटिलता, अनियन्त्रित अनलाइन व्यापार र लगानीको असुरक्षा अहिलेका प्रमुख चुनौती हुन्। स्थानीय सरकार, बैंक तथा सम्बन्धित निकायसँग समन्वय गरी नीति सुधारका लागि पहल गर्नुपर्छ।
६. बजार मन्दी र अनलाइन व्यापारको प्रभावलाई कसरी हेर्नुभएको छ ?
अनलाइन व्यापार अहिलेको यथार्थ हो। यसलाई रोक्ने होइन, व्यवस्थित र निष्पक्ष बनाउनु आवश्यक छ। स्थानीय व्यवसायीलाई पनि प्रविधिसँग जोड्नुपर्छ। संघले डिजिटल मार्केटिङ र ई–कमर्ससम्बन्धी तालिम तथा सहजीकरण गर्नुपर्छ।
७. संघभित्र सबै व्यवसायीको आवाज कसरी सुनिश्चित गर्नुहुन्छ ?
साना–ठूला सबै व्यवसायीलाई समान सम्मान गर्नुपर्छ। नियमित भेटघाट, खुला छलफल, सुझाव संकलन र पारदर्शी निर्णय प्रक्रियामार्फत सबैको आवाज संघभित्र सुनिने वातावरण बनाउनेछु।
८. साना तथा मझौला व्यवसायीको हितका लागि संघले के गर्नुपर्छ ?
साना तथा मझौला व्यवसायीका समस्या प्राथमिकतामा राख्नुपर्छ। क्षमता अभिवृद्धि तालिम, व्यवसाय प्रवर्द्धन, सहुलियत कार्यक्रम, कानुनी परामर्श र बजार विस्तारका अवसर सिर्जना गर्न संघले विशेष भूमिका खेल्नुपर्छ।
९. कर नीति, बैंकको ब्याजदर र लगानीमैत्री वातावरणबारे तपाईंको धारणा के छ ?
व्यवसायमैत्री नीति, सरल कर प्रणाली, सहज बैंकिङ सेवा र लगानीलाई प्रोत्साहन गर्ने वातावरण आवश्यक छ। स्थानीय सरकार र सम्बन्धित निकायसँग सहकार्य गरेर व्यवसायीको पक्षमा नीतिगत सुधारका लागि निरन्तर पहल गर्नुपर्छ।
१०. चुनावपछि प्रतिनिधि व्यवसायीबाट टाढा हुने आरोप छ, तपाईंले त्यो विश्वास कसरी तोड्नुहुन्छ ?
मेरो प्रतिबद्धता चुनावसम्म सीमित हुँदैन। नियमित रूपमा व्यवसायीसँग भेट्ने, उनीहरूको गुनासा सुन्ने, समाधानका लागि पहल गर्ने र गरेको कामबारे समय–समयमा जानकारी दिनेछु। मेरो सम्पर्क सधैँ खुला रहनेछ।
११. अन्त्यमा उद्योगी–व्यवसायीलाई के भन्न चाहनुहुन्छ ?
उद्योग वाणिज्य संघ व्यवसायीको साझा संस्था हो। तपाईंहरूको विश्वासले नै यो संस्था बलियो बन्छ। म इमानदार, जिम्मेवार र परिणाममुखी रूपमा काम गर्ने प्रतिबद्धता व्यक्त गर्दछु। आगामी निर्वाचनमा वाणिज्यतर्फ सदस्य पदका उम्मेदवारका रूपमा मलाई मत दिएर सेवा गर्ने अवसर दिनुहुनेछ भन्ने विश्वास लिएको छु। तपाईंहरूको विश्वासलाई कहिल्यै टुट्न दिनेछैन। धन्यवाद।
Discussion about this post