इटहरी : सुनसरीको देवानगन्ज गाउँपालिका–३ कप्तानगन्जमा लागू गरिएको अनिश्चितकालीन कर्फ्यु प्रभावकारी हुन नसक्दा सुरक्षा निकायमाथि ठूलो चुनौती थपिएको छ।
कर्फ्यु आदेश उल्लंघन गर्दै सयौं प्रदर्शनकारी सडकमा उत्रिएर टायर बाल्ने, पसलमा तोडफोड तथा आगजनी गर्न थालेपछि बजार क्षेत्र पुनः तनावग्रस्त बनेको छ भने अवस्था नियन्त्रणमा लिन नेपाल प्रहरी र सशस्त्र प्रहरीको थप टोली परिचालन गरिएको छ।
जिल्ला प्रशासन कार्यालयले सोमबार बिहान ७ बजेदेखि कर्फ्यु लागू गरे पनि करिब १० बजेदेखि चारदेखि पाँच सय जनाको समूह सडकमा उत्रिएको थियो।
प्रदर्शनकारीले कप्तानगन्ज चोकमा टायर बाल्नुका साथै स्थानीयका आधा दर्जन बढी पसलमा तोडफोड गरेका छन्। एउटा फार्मेसी, एउटा मोटरसाइकल मर्मत ग्यारेज र तीनवटा किराना पसलमा प्रत्यक्ष क्षति पुगेको प्रहरीले जनाएको छ।
सुरक्षा स्रोतका अनुसार प्रदर्शनकारीले केही पसलबाट सामान बाहिर निकालेर आगजनीसमेत गरेका छन्। घटनापछि बजार क्षेत्र त्रसित बनेको छ।
घटनास्थलमा नेपाल प्रहरी र सशस्त्र प्रहरीको ठूलो संख्या परिचालन गरिए पनि प्रदर्शनकारीलाई तत्काल नियन्त्रणमा लिन कठिनाइ भइरहेको सुरक्षा अधिकारीहरूले बताएका छन्।
अवस्था नियन्त्रणमा लिन कोशी प्रदेशका विभिन्न जिल्लाबाट थप नेपाल प्रहरी, सशस्त्र प्रहरी तथा दंगा नियन्त्रण टोलीसमेत कप्तानगन्ज पठाइएको छ।
प्रदर्शनको प्रभाव कप्तानगन्जमा मात्र सीमित नरही सुनसरीको लौकही र फूलचोकसम्म फैलिएको छ। त्यहाँ पनि टायर बालेर विरोध प्रदर्शन गरिएपछि पूर्व–पश्चिम राजमार्गमा सवारी आवागमन प्रभावित भएको छ।
आइतबार राति दुई समुदायबीच भएको हिंसात्मक झडप नियन्त्रणका क्रममा प्रहरीले चलाएको गोली लागेर देवानगन्ज–३ का २४ वर्षीय ओमप्रकाश मेहताको मृत्यु भएको थियो।
घटनामा नौ जना सर्वसाधारण गोली लागेर घाइते भएका छन्। सर्वसाधारण र सुरक्षाकर्मीसहित २२ जनाभन्दा बढी घाइते भएका छन्।
जिल्ला सुरक्षा समितिले आकस्मिक बैठक बसेर सुरक्षा व्यवस्था थप कडा बनाउने निर्णय गरेको छ। सुरक्षा निकायले अवस्था नियन्त्रणमा ल्याउने प्रयास जारी राखे पनि कप्तानगन्ज क्षेत्र अझै उच्च सुरक्षा संवेदनशील अवस्थामा रहेको जनाएको छ।
Discussion about this post