इटहरी : इटहरीको स्थानीय विषयवस्तु समेटिएको ‘इटहरीको सेरोफेरो’ नामक पुस्तकमा तथ्यहीन, असत्य र भ्रामक सामग्री राखिएको भन्दै पाँच जना स्थानीयले पुस्तकको पठनपाठन तत्काल रोक्न माग गरेका छन्।
कृष्णविनोद लम्साल, लेखनाथ घिमिरे, कृष्णप्रसाद अधिकारी, बद्रीप्रसाद पोख्रेल र लक्ष्मण निरौलाले संयुक्त प्रेस विज्ञप्ति जारी गर्दै पुस्तकमा इटहरीको इतिहास, शिक्षा, सञ्चार, साहित्य, व्यवसाय तथा सामाजिक क्षेत्रसँग सम्बन्धित विषयमा गम्भीर त्रुटि रहेको दाबी गरेका हुन्।
उनीहरूले इटहरी उपमहानगरपालिकाले कक्षा १ देखि ८ सम्मका लागि स्थानीय पाठ्यपुस्तक तयार गर्ने तयारी गरिरहेका बेला यसअघि विद्यालयमा पढाइँदै आएको ‘इटहरीको सेरोफेरो’ पुस्तकप्रति प्रश्न उठाएका हुन्।
विज्ञप्तिअनुसार पुस्तकमा इटहरीको सबैभन्दा पुरानो ‘सरस्वती सतन’ विद्यालयको नाम ‘सरस्वती सदन’ लेखिएको, धरान–धनकुटा–हिले सडक निर्माणको समय तथा इटहरी बसपार्कको स्तरोन्नतिसम्बन्धी तथ्य गलत उल्लेख गरिएको आरोप लगाइएको छ। त्यस्तै, इटहरीमा उच्च माध्यमिक विद्यालय स्थापना भएको समयसमेत गलत दिइएको उनीहरूको दाबी छ।
पुस्तकमा राजनीतिक दलको परिचय, प्रदेश ट्राफिक कार्यालयको नाम, इटहरीको यातायात तथा स्वास्थ्य सेवासम्बन्धी विषयमा समेत तथ्यगत त्रुटि रहेको विज्ञप्तिमा उल्लेख छ।
‘सिमानापारि भारतबाट उपचार गराउन इटहरी आउछन् भनिएको रहेछ । विराटनगर नाघेर उपचार गर्न आउनुपर्ने कुन अस्पताल हो ? पुस्तकमा राजनीतिक पार्टीहरूको परिचय दिइएको छ र २०८३ सालमा प्रकाशित भएको पुस्तकमा माओवादी केन्द्र इटहरीको सक्रिय राजनीतिक पार्टी भनिएको छ,’ विज्ञप्तिमा भनिएको छ, ‘प्रदेश ट्राफिक कार्यालयलाई क्षेत्रीय ट्राफिक लेखिएको छ । इटहरीलाई चालक र सहचालक अर्थात् ड्राइभर र खलासी जमघट हुने चोक भनिएको छ । उल्लिखित विषय त केवल नमूना मात्र हुन्, यस्ता त्रुटि कति हो कति छन् ।’
‘पुस्तकमा भाषा र व्याकरणसमेत अशुद्ध’
पाठ्यपुस्तकमा मानक भाषा र व्याकरणको पालना हुनुपर्नेमा पुस्तकको कभरमै ‘सामाग्री’ जस्ता अशुद्ध शब्द प्रयोग गरिएको भन्दै उनीहरूले आपत्ति जनाएका छन्।
पुस्तकले इटहरीको इतिहासलाई तोडमोड गर्नुका साथै सञ्चार, साहित्य, शैक्षिक संस्था, व्यवसाय, सामाजिक संस्था र स्थानीय व्यक्तित्वको योगदानलाई समेत उचित रूपमा प्रस्तुत नगरेको विज्ञप्तिमा उल्लेख छ।
उनीहरूले महाकाव्यकार पीताम्बरभोला लम्साल, धरणीधर दाहाल र जीवी लुगुनलगायतका व्यक्तित्वको योगदानलाई समेत पुस्तकमा बेवास्ता गरिएको दाबी गरेका छन्।
उपमहानगरपालिकासँग पनि जवाफ माग
स्थानीय पाठ्यपुस्तकका नाममा गलत सन्देश जाने सामग्री विद्यालयमा पढाइँदा पनि इटहरी उपमहानगरपालिका र शिक्षा शाखाले चासो नदेखाएको भन्दै विज्ञप्तिमा प्रश्न उठाइएको छ।
उनीहरूले पुस्तक विद्यालयमा कसरी पुग्यो, विद्यालय र शिक्षकले सामग्री परीक्षण नगरी किन पठनपाठन गराए तथा उपमहानगरपालिकाले यसबारे किन अनुगमन गरेन भन्ने प्रश्नको जवाफ दिनुपर्ने बताएका छन्।
आगामी दिनमा इटहरीको इतिहास, संस्कृति र स्थानीय विषयवस्तु समेटिने पाठ्यक्रम तथा पाठ्यपुस्तक तयार गर्दा स्थानीय विषयमा जानकार तथा सम्बन्धित विषयविज्ञको परामर्श लिनुपर्ने उनीहरूको सुझाव छ।
विज्ञप्तिअनुसार विवादित पुस्तकको पठनपाठन अविलम्ब बन्द गरी पुस्तक तयार तथा प्रयोगमा संलग्न जिम्मेवार पक्षमाथि छानबिन र कारबाही गर्न माग गरिएको छ।
विज्ञप्तिमा भनिएको छ, ‘इटहरी उपमहानगरपालिकाबाटै लागु गरिएको पुस्तक भन्ने भ्रम सिर्जना गरी विद्यालयहरूमा यस्तो पुस्तक पढाइ रहँदा पनि इटहरी उपमहानगरपालिकाको नेतृत्व वर्ग र शिक्षा शाखा देखेको नदेख्यै गरेर किन बस्यो ? यस प्रश्नको जवाफ पनि इटहरी उपमहानगरपालिकाले दिन जरुरी छ । आगामी दिनमा यसप्रकार इटहरीको अस्तित्व र विविध पक्षको सरोकार रहने पाठ्क्रम तयार गर्दा इटहरीको माटासँग भिजेका र साक्षात्कार गरेका विज्ञहरू परामर्श लिन एवम् सम्बद्ध विषयविज्ञबाट तयार गर्न सुझाव समेत दिन चाहन्छौँ ।’
Discussion about this post