जनता माविको कक्षा ११ मा विद्यार्थीको आकर्षण

विद्यार्थीको बढी चापका कारण कक्षा ५ देखि ९ सम्म प्रवेश परीक्षा लिएर विद्यार्थी भर्ना गर्न थालेको इटहरीस्थित जनता माविको कक्षा ११ मा पनि विद्यार्थीको आकर्षण देखिएको छ ।

अंग्रेजी माध्यमबाट अध्यापन सुरु गरेको जनता माध्यमिक विद्यालयले विद्यालय भर्ना गर्दा प्रवेश परीक्षा लिने गरेकोछ । यो वर्ष भने कोभिड १९ का कारण प्रवेश परिक्षा हुन नसक्दा आवेदन दिने सबै विद्यार्थीको भर्ना लिइएको छ ।

केही वर्षअघिसम्म पनि सामान्य सरकारी विद्यालयको रुपमा हेपिएको अवस्थामा रहेको जनता विद्यालयको कक्षा ११ र १२ मा पनि विद्यार्थीको आकर्षण बढ्दो छ ।

‘कक्षा ११ मा राम्रा स्कुलका राम्रा विद्यार्थीहरुसमेत भर्नाको लागि आइरहेका छन्,’ विद्यालयका प्राचार्य छत्रपती ढुंगेलले भने, ‘हामीले यो पटकदेखि विद्यालयको अध्ययन वातावरण अझ राम्रो र स्तरीय बनाएर लगेका छौं ।’ उनका अनुसार गतवर्ष कक्षा ११ मा ३५० जना विद्यार्थी भर्ना गरिएको थियो ।

विद्यालयसँग अहिले स्तरीय कम्प्युटर ल्याब छ । अंग्रेजी माध्यममा आइडी, प्रोजेक्टर र ल्यापटपबाट कक्षा सञ्चालन भइरहेको छ । ‘नेपाली माध्यमलाई पनि नमुना विद्यालय बनाउनकालागि सेवा सुविधा थप गर्दै लगेका छौं,’ उनले भने । उनकाअनुसार अर्को वर्षबाट विज्ञान संकाय सुरु गर्ने तयारी छ । सोको लागि आवश्यक पूर्वाधार सरकारको नमुना विद्यालय अभियानअन्तर्गत निर्माण हुनेछ ।

विद्यालयको पढाइ र व्यवस्थापनबाट अविभावकहरु र विद्यार्थीहरु पनि खुसी छन् । निजी विद्यालयमा राम्रो नतिजा ल्याएर पास भइरहेका विद्यार्थीहरु पनि जनतामा भर्ना भएका छन् । सामुदायिक विद्यालयको प्रमाणपत्रको मान्यता राम्रो हुने अनि जनता स्कुलको शिक्षा निजीको भन्दा फरक नभएकोले अझ शुल्क सस्तो रहेकोले जनता स्कुल छानेको उनीहरुको भनाई छ ।

अविभावकहरुको सन्तुष्टि, विद्यालयको व्यवस्थापकीय क्षमता र व्यवस्थापन समितिको दूरगामी महत्वको योजनाका कारण जनता विद्यालयलाई नमुना विद्यालय बनाउने भनेर नेपाल सरकारले आर्थिक सहयोग गरिरहेको छ । सोअनुसार अत्याधुनिक भवन र अन्य पूर्वाधार निर्माण हुनेछन् । ‘तीन सय विद्यार्थी अट्ने गरी अत्याधुनिक विद्यालय भवन बनिरहेको छ,’ भवन निर्माण समितिका अध्यक्ष दीपक ढकालले भने, ‘लोभलाग्दो नमुना स्कुल केही वर्षमै बनाएर छाड्छौं ।’ उनका अनुसार बहुवर्षिय बजेटबाट निर्माण हुने भवन बनिरहेको छ ।

पाँच वर्षमा प्रदेशकै नमुना विद्यालय बनाउने अभियानका साथ आफूहरु लागिपरेको विद्यालय व्यवस्थापन समितिका अध्यक्ष काशीनाथ दंगाल बताउँछन् । ‘कक्षा ११ र १२ मा पनि प्रविधिमैत्री कक्षा कोठाहरुको व्यवस्था गरेर पढाइरहेका छौं,’ उनी भन्छन्, ‘ए ग्रेड ल्याएका विद्यार्थीलाई भर्ना तथा शुल्कमा भारी छुट दिने व्यवस्था छ भने नजान्ने विद्यार्थीलाई पनि जान्ने बनाउने गरी उनीहरुको व्यक्ति विशेषको क्षमता उजागर गर्ने गरी पढाइरहेका छौं ।’

उनकाअनुसार एसइइमा राम्रो नतिजा ल्याएकाहरुलाई जनता स्कुलमा विशेष छुट र सुविधा दिइएको छ । गरीब र जेहेन्दारलाई पनि छात्रवृत्तीको व्यवस्था गरिएको छ । राम्रो सिकाइ वातावरणका लागि घोकाएर भन्दा पनि बुझाएर सिकाइने गरिन्छ । बसको सुविधा र डिजिटल बोर्डसहितको स्मार्ट कक्षा कोठाको व्यवस्थालाई विद्यालयले विशेष जोड दिएको छ । अंग्रेजी माध्यमबाट पढाइ हुने कक्षाहरुमा सोको व्यवस्था गरिसकेको छ भने नेपाली माध्यमका कक्षाहरुमा समेत यसै शैक्षिक सत्रदेखि व्यवस्था गर्दैछ ।

‘हामीले विद्यार्थीलाई कसरी सिर्जनसिल बनाउने विषयमा केहि योजना बनाएर पठनपाठन सुरु गरेका छौँ,’ उनले भने, ‘सरकारी क्याम्पसमा पनि राम्रो पढाइ हुन्छ भन्ने मान्यता स्थापित गर्न हामी लागिपरेका छौं ।’

विद्यालय व्यवस्थापन समिति सदस्य शिव दाहालकाअनुसार निम्न आर्थिक अवस्थाका विद्यार्थीहरु पढ्ने हुँदा यो सरकारी विद्यालयको सुधार अनिवार्य छ । ‘त्यसैले नयाँ व्यवस्थापन समिति बनेपछि झण्डै तीन वर्षयता विद्यालयको शैक्षिक तथा पूर्वाधारको क्षेत्रमा विशेष ध्यान दिइएको छ । विद्यालयले आफ्नो शैक्षिक गुणस्तर निजी विद्यालयहरुको भन्दा राम्रो दावी गरेको छ । दाहालका अनुसार विद्यालयका शिक्षक सबै स्नातकोत्तर पास गरेका छन् ।

यस्तै इटहरीको मुख्य चोकमै रहेको भवनमा कक्षा ११ र १२ को पढाइ हुने गरेको छ । ‘इटहरी चोकमै शान्त वातावरणमा कक्षा ११ र १२ पढाइ हुने यो एउटै मात्र विद्यालय हो,’ उनले भने, ‘त्यसैले विद्यार्थीहरुको पहुँच सहज बनेको छ ।’

विद्यालयका शिक्षक शिक्षिकादेखि लिएर सबै जना अहिले निजि विद्यालयकोभन्दा सरकारी विद्यालयमा राम्रो तथा गुणस्तरीय शिक्षा दिनु पर्छ भनेर लागि परेका छन् । गुणस्तरमा निजीभन्दा राम्रो शिक्षा दिने उद्धेश्यले जनता स्कुल लागिपरेको विद्यालयका सहायक प्रिन्सिपल पशुपती सिग्देलले जानकारी दिए ।

व्यवस्थापन समिति सदस्य विमला ढकालका अनुसार जनता स्कुल शिक्षामा बन्चित हुनु नपरोस् भन्ने व्यक्तिहरुको आवाज बोकेको विद्यालय हो । विद्यार्थी संख्या बढी भएपनि सबैले पढ्न पाउने गरी विद्यालय भवन तयार हुँदैछ । ‘गरिबिको रेखामुनि रहेका अभिभावकहरुका छोराछोरी पनि गुणस्तरीय शिक्षाबाट बन्चित नहुन् भन्ने उद्देश्यले हामीले यो निर्माण गर्न लागिरहेका छौँ,’ उनले भनिन्, ‘स्तरीय शिक्षाको लागि शिक्षक पनि त्यही लेबलको, राजनीतिक आधार नबनाइ प्रक्रियाबाट नियुक्त गरेकोले यो विद्यालय इटहरीको मात्र नभएर प्रदेशकै नमुना स्तरीय विद्यालय बन्ने तरखरमा छ ।’