उदयपुर : उदयपुरको कटारी नगरपालिका–४ स्थित मरुवा खोला नजिक सिद्धिचरण लोकमार्गमा बोलेरो दुर्घटना हुँदा १५ जना घाइते भएका छन्। सोमबार बिहान भएको दुर्घटनामा तीन जना मध्यम र १२ जना सामान्य घाइते भएका हुन्।
कटारी नगरपालिका–११ स्थित बेतिनी नजिकको गहुँबारीबाट कटारी बजारतर्फ आउँदै गरेको यात्रु तथा मालसामान बोकेको प्रदेश ३–०१–०२३ च ६५०६ नम्बरको बोलेरो गाडीको ब्रेक फेल भएपछि दुर्घटना भएको प्रहरीले जनाएको छ।
कटारी–४ को मरुवा खोला नजिक सिद्धिचरण लोकमार्गबाट करिब १० मिटर तल खसेर गाडी दुर्घटना भएको हो। दुर्घटनामा घाइते भएका १५ जनालाई उपचारका लागि कटारीस्थित प्रादेशिक अस्पताल लगिएको थियो।
घाइतेमध्ये टाउकोमा चोट लागेका तीन जनाको अवस्था मध्यम रहेको र थप उपचारका लागि विराटनगर रिफर गरिएको प्रहरीले जनाएको छ। रिफर गरिएकामध्ये कटारी नगरपालिका–२ का रामबहादुर मगर र कटारी नगरपालिका–११ का निर्पबहादुर खड्का रहेका छन्।
अन्य १२ जना सामान्य घाइतेको कटारीस्थित प्रादेशिक अस्पतालमा उपचार भइरहेको प्रहरीले जनाएको छ।
Discussion about this post