सुनसरीका विवादित एसपी कमल थापाका घुमुवा तानिए

इटहरी : जिल्ला प्रहरी कार्यालय सुनसरीका प्रहरी प्रमुख (एसपी) कमल थापाका घुमुवा र केही चौकीका इन्चार्जलाई प्रदेश प्रहरी कार्यालय विराटनगरले तानेको छ ।

केही समय अगाडि लागूऔषध कारोबारी र सीमाबाट हुने चोरी निकाशीका सम्बन्धमा आर्थिक चलखेल गरेको आरोप खेपेका एसपी थापाका घुमुवा प्रहरी र केही चौकीका इञ्चार्जलाई प्रदेश प्रहरी कार्यालय विराटनगरले तानेको हो ।

सीमा क्षेत्रमा हालपनि आर्थिक चलखेल भएको आशंकामा एसपी थापाका केही घुमुवालाई प्रदेश प्रहरी कार्यालय विराटनगरले तानिएको प्रहरी स्रोतले बताएको छ ।

भारतको सीमनासँग जोडिएको सुनसरीमा लामो समयअगाडिबाट लागूऔषध कारोबारी सक्रिय रहेपनि प्रहरीले आर्थिक चलखेल गरी छाड्ने गरेको आरोप लाग्ने गरेको छ ।

लागूऔषध कारोबारमा संलग्नलाई आर्थिक चलखेल गरी रकम लिदैँ छाड्ने, माग गरेजति रकम नदिए मुद्धा चलाउने र भारतसँगको खुल्ला नाकाबाट चोरी तस्करीमा सेटिङ गरी रकम लिने गरेको उजुरी परेपछि यसअघि एसपी थापामाथि प्रदेश प्रहरी कार्यालय विराटनगरले छानबिन समेत गरेको थियो ।

केही महिना अगाडि मात्रै उनी विरुद्ध अख्तियार दुरुपयोग अनुसन्धान आयोगको कार्यालय इटहरीमा समेत उजुरी परेको थियो ।

सुनसरी आएपछि एसपी थापाले आँफू आईजीपी शैलेश थापाको विश्वासपात्र भएको भन्दै उच्च पदस्थ अधिकारीहरुको निर्देशन समेत अवज्ञा गर्न थालेको स्रोतले बताएको छ ।

प्रदेश प्रहरी कार्यालय विराटनगर र अख्तियार दुरुपयोग अनुसन्धान आयोगले छानबिन गरेपनि छानबिन समिति यकिन निचोडमा भने पुग्न सकेको छैन ।

उता, प्रदेश १ का प्रहरी प्रमुख डिआईजी इश्वरबाबु कार्कीले घुमुवा तानिनु सामान्य विषय रहेको जानकारी दिए । उनले यो नियमित प्रक्रिया भएको प्रतिक्रिया दिदैँ लामो समयदेखि कार्यरत प्रहरीहरुलाई तानेको बताए ।