उदयपुर : उदयपुरको त्रियुगा नगरपालिका–११, गाईघाटमा स्कुटरको ठक्करबाट एक पैदलयात्रीको मृत्यु भएको छ ।
शनिबार राति ८ः५० बजे सङ्गम टोलस्थित इनार चोकबाट पिपलचोकतर्फ आउँदै गरेको प्रदेश ३–०२–०१२ प ४८२२ नम्बरको स्कुटरले पैदलयात्रीलाई ठक्कर दिएको जिल्ला प्रहरी कार्यालय उदयपुरले जनाएको छ ।
स्कुटरको ठक्करबाट स्थानीय ५२ वर्षीय रामबहादुर कार्की गम्भीर घाइते भएका थिए । उनलाई उपचारका लागि जिल्ला अस्पताल उदयपुर लगिएकोमा राति ९ः१५ बजे चिकित्सकले मृत घोषणा गरेका थिए ।
मृतकको शव जिल्ला अस्पताल उदयपुरको शवगृहमा राखिएको छ । दुर्घटनामा संलग्न स्कुटर चालक त्रियुगा नगरपालिका–११, ढिम्कीका २३ वर्षीय दिलीप केसीलाई प्रहरीले नियन्त्रणमा लिएको छ ।
घटनाबारे थप अनुसन्धान भइरहेको जिल्ला प्रहरी कार्यालय उदयपुरले जनाएको छ।
Discussion about this post