विराटनगर : प्रदेश १ का २८ प्रतिनिधिसभा र ५६ प्रदेशसभा निर्वाचन क्षेत्रमा नेकपा माओवादी केन्द्रले गठबन्धनबाट २६ जना उम्मेदवार पाएको छ ।
आगामी मंसिर ४ गते हुने निर्वाचनमा माओवादी केन्द्रबाट प्रतिनिधिसभामा ७ र प्रदेशसभाका १९ निर्वाचन क्षेत्रमा उम्मेदवारी दर्ता भएको हो ।
प्रतिनिधिसभातर्फ माओवादीले ताप्लेजुङमा खेलप्रसाद बुढाक्षेत्रीलाई उम्मेदवार बनाएको छ । नेकपा एमालेका सचिव योगेश भट्टराईसँग मैदानमा उत्रने उनी माओवादीका केन्द्रीय सदस्य हुन् ।
माओवादीले झापा २ मा एमाले छाडेर माओवादी केन्द्रमा प्रवेश गरेका हरिकुमार रानालाई उम्मेदवार बनाएको छ । सो क्षेत्रमा एमालेले पार्टीका प्रदेश इञ्चार्ज देवराज घिमिरेलाई उम्मेदवार बनाएको छ । राना अर्जुनधारा नगरपालिकाका पूर्वमेयर हुन् ।
यस्तै, मोरङको क्षेत्र नं. ४ मा अमनलाल मोदी र ५ मा शिवकुमार मण्डल उम्मेदवार बनेका छन् ।
उनीहरु दुवै यसअघिको निर्वाचनमा सोही क्षेत्रबाट निर्वाचित भएका थिए । मोरङ क्षेत्र नं. ४ मा एमाले र जसपाको गठबन्धनबाट एमालेका विनोद ढकाल र क्षेत्र नं. ५ मा जसपाका राजकुमार यादव उम्मेदवार बनेका छन् । मोदी र मण्डलका लागि संसदीय निर्वाचन पुरानै खेल हो भने प्रतिस्पर्धी उम्मेदवारमध्ये यादवका लागि नयाँ हो ।
यता, सुनसरीको क्षेत्र नम्बर १ मा माओवादीले मुक्साहाङ मेन्याङ्बोलाई उम्मेदवार बनाएको छ । सो क्षेत्रमा एमाले र जसपाको गठबन्धनबाट अशोक राईले उम्मेदवारी दिएका छन् ।
भोजपुरमा माओवादीले निवर्तमान सांसद सुदन किरातीलाई उम्मेदवार बनाएको छ ।
उनीसँग नेकपा एमालेको तर्फबाट पूर्वमुख्यमन्त्री शेरधन राईले उम्मेदवारी दर्ता गरेका छन् । स्थानीयस्तरमा लोकप्रिय र चिरपरिचित प्रतिस्पर्धी उनका लागि सहज बन्नसक्छ । यद्यपि, शेरधन राई एमालेका लोकप्रिय नेता हुन् भने भोजपुरमा एमालेको संगठन बलियो रहेको छ ।
खोटाङमा माओवादीले प्रदेशका बहालवाला मन्त्री रामकुमार राईलाई उम्मेदवार बनाएको छ । सो क्षेत्रमा एमालेका विशाल भट्टराई उम्मेदवार बनेका छन् । यस्तै, माओवादीको भागमा परेको भनिएको सोलुखुम्बु भने प्रदेशसभाको दुवै क्षेत्र लिएर प्रतिनिधिसभामा कांग्रेसका बलबहादुर केसीलाई दिएको छ ।
यस्तै, ५६ वटा प्रदेश निर्वाचन क्षेत्रमध्ये माओवादीको भागमा १९ वटा परेको छ । पाँचथरको २ बाट प्रदेश सरकारका आर्थिक मामिला तथा योजनामन्त्री इन्द्रबहादुर आङ्बो उम्मेदवार बनेका छन् भने इलामको २ (ख) बाट हर्क लावती उम्मेदवार बनेका छन् । लावती नयाँ अनुहार हुन् ।
झापा ३ (क) बाट श्यामबीर लिम्बू, ३ (ख) बाट निवर्तमान सांसद पूर्णसिंह राजवंशी, झापा ४ (क) बाट प्रदेश सरकारका कृषिमन्त्री झलकसिंह दर्लामी, झापा ५ (ख) बाट पार्टीका प्रदेश कोषाध्यक्ष रेवतबहादुर पुरी (गगन) उम्मेदवार बनेका छन् ।
यसैगरी मोरङ १ (क) बाट निवर्तमान प्रदेश सांसद कुलप्रसाद साम्बा, मोरङ २ (क) बाट पार्टीका प्रदेश सचिव गणेश उप्रेती, मोरङ ६ (क) बाट केन्द्रीय सदस्य जीवन आचार्यले उम्मेदवारी दिएका छन् ।
सुनसरी २ (क) बाट हालै एमाले छाडेर माओवादीमा प्रवेश गरेका इटहरीका निवर्तमान मेयर द्वारिकलाल चौधरीले उम्मेदवारी दर्ता गरेका छन् भने सुनसरी ३ (१) बाट प्रदेशकी उपसभामुख सरस्वती पोखरेलको उम्मेदवारी दर्ता भएको छ ।
धनकुटा १ (ख) बाट कुशुमकुमारी श्रेष्ठ र तेह्रथुम १ (ख) बाट दुर्गा चापागाई उम्मेदवार बनेका छन् । श्रेष्ठ निवर्तमान सांसद हुन् भने चापागाई पार्टीका केन्द्रीय सदस्य हुन् ।
यसैगरी संखुवासभाबाट राजेन्द्र कार्की, सोलुखुम्बुको (क) बाट कज्र्याङ शेर्पा, सोलुखुम्बुको (ख) बाट शिवबहादुर बस्नेत, उदपयुरको १ (क) बाट नारायण बुर्जा मगर र उदयपुर २ (क) बाट राजन किराती उम्मेदवार बनेका छन् । ओखलढुंगा (क) मा बाबुराम गौतमलाई माओवादीले उम्मेदवार बनाएको छ ।
Discussion about this post