उदयपुर : जिल्ला प्रहरी कार्यालय उदयपुर र मातहतका प्रहरी कार्यालयमा २०८३ असोज महिनामा विभिन्न प्रकृतिका ४२ वटा मुद्दा दर्ता भएका छन् ।
जिल्ला प्रहरी कार्यालय उदयपुरले सोमबार सार्वजनिक गरेको विवरणअनुसार दर्ता मुद्दामध्ये १६ वटा सामान्य प्रकृतिका र २२ वटा गम्भीर प्रकृतिका रहेका छन् । बाँकी चार मुद्दाको प्रकृति भने विवरणमा स्पष्ट खुलाइएको छैन ।
महिला तथा बालबालिकाविरुद्धका कसुरमा आठ वटा मुद्दा दर्ता भएका छन् । तीमध्ये महिलासम्बन्धी पाँच र बालबालिकासम्बन्धी तीन मुद्दा छन् । आर्थिक अपराधतर्फ ठगीका एक र बैंकिङ कसुरका पाँच गरी छ वटा मुद्दा दर्ता भएका छन् । सम्पत्ति शुद्धीकरणसम्बन्धी एउटा मुद्दा पनि दर्ता भएको प्रहरीले जनाएको छ ।
चालु मुद्दाका प्रतिवादी पक्राउ गर्ने क्रममा ३१ जना र फरार प्रतिवादी १५ जना पक्राउ परेको विवरणमा उल्लेख छ । अदालतको फैसला कार्यान्वयनतर्फ दुई जना फरार प्रतिवादी पक्राउ गरी एक वर्ष छ महिना कैद भुक्तान गराउन जिल्ला अदालत उदयपुरमा पेस गरिएको छ । उनीहरूबाट एक लाख रुपैयाँ जरिवानासमेत असुल गरिएको प्रहरीले जनाएको छ ।
महिला तथा बालबालिकासम्बन्धी आठ उजुरी
असोजमा घरेलु हिंसासम्बन्धी आठ वटा उजुरी दर्ता भएका छन् । ती घटनामा आठ जना पीडित र आठ जना पीडक रहेको प्रहरीले जनाएको छ । शारीरिक तथा मानसिक यातनासम्बन्धी उजुरीमध्ये आठ वटै मिलापत्रका लागि प्रक्रिया अघि बढाइएकामा छ वटाको मिलापत्र भएको र दुई वटा बाँकी रहेका छन् । ती उजुरीमध्ये गाउँपालिकासँग सम्बन्धित एउटा र नगरपालिकासँग सम्बन्धित सात वटा छन् ।
जिल्ला प्रहरी कार्यालयमा प्रत्यक्ष रूपमा परेका ९८ वटा ठाडो उजुरी सबै मिलापत्र गराइएको छ । जिल्ला प्रशासन कार्यालयमार्फत प्राप्त १७ वटा उजुरीमा पनि मिलापत्र भएको प्रहरीको विवरणमा उल्लेख छ ।
असोजमा १९ जना हराए, १२ जना फेला
असोज महिनामा उदयपुरमा १९ जना हराएको विवरण प्रहरीमा आएको छ । हराउनेमा छ जना महिला, चार जना पुरुष, तीन जना बालक, चार जना बालिका र एक जना ज्येष्ठ नागरिक रहेका छन् ।
सोही महिनामा १२ जना फेला परेका छन् । फेला पर्नेमा चार जना महिला, एक जना पुरुष, तीन जना बालक र चार जना बालिका छन् । हराएर सोही महिनामा फेला परेका ११ जनामा तीन जना महिला, एक जना पुरुष, तीन जना बालक र चार जना बालिका रहेको प्रहरीले जनाएको छ ।
जिल्ला प्रहरी कार्यालय उदयपुरले सार्वजनिक गरेको मासिक विवरणमा अपराधका मुद्दा, प्रतिवादी पक्राउ, घरेलु हिंसा, हराएका व्यक्ति तथा उजुरीको अवस्था समेटिएको छ ।
Discussion about this post