इटहरी (डेस्क) : सप्तकोसी नदीको पानी धरान ल्याउने विषयमा धरान उपमहानगरपालिकाका प्रमुख हर्कराज राई (हर्क साम्पाङ) र बराहक्षेत्र नगरपालिका प्रमुख रमेश कार्कीबीच छलफल भएको छ ।
बराहक्षेत्र नगरपालिकाको कार्यालयमा बुधबार भएको छलफलमा धरान उपमहानगरपालिकाका मेयर राईले बराहक्षेत्रका मेयर कार्कीलाई चतरास्थित सप्तकोसीको पानी धरान ल्याउने विषयमा औपचारिक रूपमा पत्रसहित सहयोगको लागि आग्रह गरेका थिए ।
मेयर कार्कीले धरान उपमहानगरपालिकाको योजनालाई पूर्ण रूपमा सहयोग र सहकार्य गर्न तयार रहेको प्रतिबद्धता व्यक्त गरे ।
औपचारिक रूपमा दुई छिमेकी पालिकाका प्रमुखको तेस्रो पटक भएको भेटमा खानेपानीसहित अन्य विषयमा समेत छलफल भएको बराहक्षेत्र नगरपालिका सूचना अधिकृत पुकार पोखरेलले बताए ।
धरान उपमहानगरका मेयरले चतराबाट पानी धरान लैजाने योजनालाई दुईवटा पालिकाको संयुक्त कार्यक्रम रूपमा लैजानुपर्नेमा जोड दिएका थिए ।
पानीसहित फोहोर व्यवस्थापन, सडक पूर्वाधार, धार्मिक सर्किट लगाएका विषयमा बराहक्षेत्र नगरपालिकासँग सहकार्य गरेर काम गर्ने धरानका मेयर साम्पाङले बताए । बराहक्षेत्र नगरपालिकामा छलफल लगत्तै दुवै मेयरसहित टोली सप्तकोसीमा पनि पुगेका थिए ।
मेयर साम्पाङकोशीबाट पानी धरान ल्याउन लिफ्ट गर्ने स्थानबारे बराहक्षेत्रका मेयर कार्कीलाई स्थलगत निरीक्षण पनि गराए ।
छलफल तथा अवलोकनमा धरानबाट मेयर साम्पाङ, उपमेयर आइन्द्रविक्रम बेघा, प्रमुख प्रशासकीय अधिकृत उद्धवप्रसाद रिजालसहितको टोली पुगेको थियो ।
यस्तै, बराहक्षेत्रबाट मेयर कार्की, वडा नं. १ का वडाध्यक्ष किसान थापा मगर, वडा नं. ६ का अध्यक्ष उद्धवप्रसाद पोखरेल, योजना शाखाका प्रमुख राजु भट्टराई लगायतले अवलोकन गरेका थिए ।
Discussion about this post