विराटनगर : कोशी प्रदेशका पर्यटकीय क्षेत्रको सुरक्षा तथा पर्यटकमैत्री सेवा प्रवाहलाई थप प्रभावकारी बनाउने उद्देश्यले सञ्चालन गरिएको सातदिने ‘पर्यटक प्रहरी अनुशिक्षण’ तालिम सम्पन्न भएको छ।
कोशी प्रदेश प्रहरी कार्यालय विराटनगरको आयोजनामा सञ्चालन भएको तालिमको समापन कोशी प्रदेश सरकार, पर्यटन, वन तथा वातावरण मन्त्रालयका प्रदेश सचिव डा. इन्द्रप्रसाद सापकोटाको प्रमुख आतिथ्यमा भएको हो।
समापन कार्यक्रममा प्रदेश सचिव सापकोटाले कोशी प्रदेशका प्राकृतिक, धार्मिक तथा रमणीय पर्यटकीय गन्तव्यमा आउने स्वदेशी तथा विदेशी पर्यटकको शान्ति–सुरक्षा, सहजीकरण र सेवा प्रवाहमा पर्यटक प्रहरीको भूमिका महत्वपूर्ण रहने बताए।
उनले प्रशिक्षार्थीसँग अन्तरक्रिया गर्दै उनीहरूले उठाएका जिज्ञासाको समेत समाधान गरेका थिए।
कार्यक्रममा कोशी प्रदेश प्रहरी प्रमुख प्रहरी नायब महानिरीक्षक विनोद घिमिरेले तालिमबाट प्राप्त ज्ञान र सीपलाई कार्यक्षेत्रमा प्रभावकारी रूपमा प्रयोग गर्दै पर्यटकीय क्षेत्रको सुरक्षा सुदृढ बनाउन र पर्यटकको सुरक्षाप्रति विशेष संवेदनशील हुन सहभागीलाई निर्देशन दिए।
तालिम संयोजक प्रहरी निरीक्षक विगम खड्काले तालिमको प्रतिवेदन प्रस्तुत गरेका थिए।
सात कार्यदिनसम्म सञ्चालन भएको उक्त तालिममा कोशी प्रदेशअन्तर्गत विभिन्न प्रहरी कार्यालयमा कार्यरत जुनियर प्रहरी अधिकृत तथा प्रहरी जवान गरी ३० जना प्रहरी कर्मचारी सहभागी थिए।
- तालिमले पर्यटकमैत्री प्रहरी सेवा विकास, पर्यटकीय क्षेत्रको सुरक्षा व्यवस्थापन तथा पर्यटन प्रवर्द्धनमा सहयोग पुग्ने विश्वास व्यक्त गरिएको छ।
Discussion about this post