इटहरी : गत भदौमा जेनजी आन्दोलनका क्रममा आगजनीबाट ध्वस्त बनेको इटहरीस्थित प्रहरी भवन पुनर्निर्माण भएपछि स्थानीय स्तरमा प्रहरी सेवा पुनःस्थापित भएको छ।
पुनर्निर्मित भवनबाट शुक्रबारदेखि वडा प्रहरी कार्यालय सञ्चालनमा आएसँगै आन्दोलनपछि कमजोर बनेको सुरक्षा उपस्थितिले फेरि स्थायित्व पाएको हो।
भदौ २३ र २४ गतेको आन्दोलनमा आगजनी हुँदा तत्कालीन इलाका प्रहरी कार्यालय पूर्ण रूपमा नष्ट भएको थियो।
त्यसपछि प्रहरी सेवा निरन्तर राख्न अस्थायी संरचनाबाट काम सञ्चालन गरिँदै आएको थियो। अहिले भवन पुनर्निर्माण सम्पन्न भएपछि वडा प्रहरी कार्यालयका रूपमा नियमित सेवा सुरु गरिएको हो।
सुनसरी प्रहरी प्रमुख एसपी केशव थेबेका अनुसार कार्यालयमा प्रहरी सहायक निरीक्षक (सई) को नेतृत्वमा नौ जना प्रहरी कर्मचारी खटिएका छन्।
स्थानीय स्तरमा प्रहरीको प्रत्यक्ष उपस्थिति बढेसँगै सुरक्षा व्यवस्थापन, अपराध नियन्त्रण र नागरिकलाई छिटो सेवा प्रवाहमा सहज हुने अपेक्षा गरिएको उनले बताए।
यद्यपि, आन्दोलनअघि रहेको इलाका प्रहरी कार्यालय भने अझै आफ्नै भवनमा फर्किएको छैन। उक्त कार्यालय हाल इटहरी रङ्गशाला परिसरमा विभिन्न दाताको सहयोगमा निर्माण गरिएको अस्थायी संरचनाबाट सञ्चालन भइरहेको छ।
पुनर्निर्मित भवनलाई वडा प्रहरी कार्यालयका रूपमा सञ्चालनमा ल्याइएपछि इटहरीको स्थानीय सुरक्षा संयन्त्र थप सुदृढ हुने विश्वास गरिएको प्रहरीले जनाएको छ।
Discussion about this post