मोरङ : मोरङको बुढीगंगा गाउँपालिका–४ अगुर दाना मिल अगाडि ट्रकको चक्काले किचेर एक जनाको मृत्यु भएको छ।
मृत्यु हुनेमा सुनसरीको गढी गाउँपालिका–२ घर भई हाल मोरङको बूढीगंगा–५ दीपु टोलस्थितमा बस्दै आएका ३५ वर्षीय सुरज ऋषिदेव रहेका छन्।
प्रहरीका अनुसार उनी लडिरहेको भन्ने सूचना पाएपछि इलाका प्रहरी कार्यालय नेमुवाको टोली घटनास्थल पुगेर उपचारका लागि विराट टिचिङ अस्पताल पठाएको थियो। तर चिकित्सकले साँझ ७ बजेतिर उनलाई मृत घोषणा गरेका थिए।
पोस्टमार्टमका लागि शव कोशी अस्पताल विराटनगर पठाइएको थियो। पोस्टमार्टम प्रतिवेदनमा मृत्यु सामान्य नभई बाह्य कारणबाट भएको देखिएपछि प्रहरीले अनुसन्धान अघि बढाएको थियो।
अनुसन्धानका क्रममा ना ७ ख ७८८ नम्बरको ट्रक रोकिराखेको अवस्थामा उक्त ट्रकमुनि सुरज सुतेको अवस्थामा रहेका बेला चालकले ट्रक अगाडि बढाउँदा चक्काले किचेर उनको मृत्यु भएको खुलेको प्रहरीले जनाएको छ।
घटनामा संलग्न ट्रक र चालक झापाको कचनकवल गाउँपालिका–१ निवासी ३० वर्षीय हरी थापालाई नियन्त्रणमा लिएर थप अनुसन्धानका लागि जिल्ला प्रहरी कार्यालय मोरङ पठाइएको प्रहरीले जनाएको छ।
घटना सम्बन्धमा ट्राफिक प्रहरी कार्यालय नेमुवाले अनुसन्धान गरिरहेको छ।
Discussion about this post