इटहरी : उच्च शिक्षालय तथा माध्यमिक विद्यालय संघ नेपाल (हिसान) सुनसरीले हिसान शिक्षा पत्रकारिता पुरस्कारबाट सुनसरीका तीन जना पत्रकारलाई सम्मान गरेको छ ।
इटहरीस्थित कस्तुरी कलेजमा हिसान स्पोर्टस मिट २०८० को समापनको अवसर पारेर हिसान सुनसरीले पत्रकारिताको माध्यमबाट शैक्षिक जागरण तथा सचेतना विकास गर्न योगदान पुर्याएको भन्दै इटहरीका पत्रकार अर्जुन सुवेदी, धरानका पत्रकार भोजराज श्रेष्ठ र इनरुवाका पत्रकार जयकृष्ण यादवलाई जनही नगद १० हजार पुरस्कार सहित सम्मान तथा पुरस्कृत गरेको हो ।
सुवेदी कान्तिपुर टेलिभिजनका सुनसरी संवाददाता हुन भने श्रेष्ठ ब्लष्ट टाईम्स दैनिकका कार्यकारी सम्पादक हुन् । यादव गोरखापत्र दैनिकका इनरुवा संवाददाताको रूपमा कार्यरत छन् ।
उनीहरूलाई हिसानका केन्द्रीय उपाध्यक्ष युवराज शर्मा, केन्द्रीय सदस्य बलराम पन्त, मुकुन्द घिमिरे, गङ्गाप्रसाद चौलागाई, सल्लाहकार लेखनाथ घिमिरे लगायतले दोसल्ला र सम्मान पत्रसहित नगद पुरस्कारले पुरस्कृत गरे ।
हिसान सुनसरीले प्रत्येक वर्ष बिशेषगरी शिक्षा क्षेत्रमा कलम चलाउने पत्रकारहरूलाई सम्मान तथा पुरस्कृत गर्दै आएको अध्यक्ष सागरप्रसाद भटराईले बताए ।
Discussion about this post