इटहरी : सुनसरी प्रहरीले भरुवा बन्दुकसहित पाँच जनालाई पक्राउ गरेको छ । धरान उपमहानगरपालिका १९ हरियाली चारकोसे जंगलबाट पाँच जनालाई प्रहरीले पक्राउ गरेको हो ।
धरानबाट रासतालतर्फ आउँदै गरेको बा ४ च ४३३ नम्बरको कारलाई इलाका प्रहरी कार्यालय धरानबाट खटिएको प्रहरी टोलीले शंका लागेर चेकजाँच गरेको थियो ।
पक्राउ पर्नेमा इटहरी उपमहानगरपालिका–१३ का ३५ वर्षीय ज्योतिष चौधरी, रामधुनी नगरपालिका–७ का ३३ वर्षीय सञ्जु राई, ३१ वर्षीय विनय राजधामी, २८ वर्षीय दिवश माझी र मोरङको सुन्दरहरैँचा नगरपालिका–२ का ४१ वर्षीय मेहरमान भुजेल रहेका छन् ।
जसमध्ये ज्योतिषले कार चलाएका थिए ।
कोशी प्रदेश प्रहरी कार्यालय विराटनगरका प्रवक्ता, एसएसपी भीमबहादुर दाहालका अनुसार पक्राउ परेकाको साथबाट भरूवा बन्दुक एक थान, भरूवा बन्दुकमा लाग्ने फलामको गोली ३ थान, टोटा बन्दुकको गोली २ थान, बारूद ३ बट्टा र १ पोका तथा खुकुरी १ थान बरामद भएको छ ।
भरुवा बन्दुकसहितका सामाग्री कारको सिटको भुइँमा फेला परेको एसएसपी दाहालले बताए ।
पक्राउ परेको समूह वन्यजन्तुको चोरी सिकारीमा संलग्न रहेको प्रहरीको प्रारम्भिक अनुसन्धानबाट खुलेको छ ।
पक्राउ परेका पाँचै जनामाथि इलाका प्रहरी धरानको हिरासतमा राखेर थप अनुसन्धान भइरहेको प्रहरीले जनाएको छ ।
Discussion about this post