धरान : धरानमा जारी कोशी प्रदेश प्रिमियर लिग फुटबल प्रतियोगितामा मोरङको सम्राट स्पोर्टिङ क्लब र धाइजन चारआली फुटबल क्लब विजयी हुँदै आ–आफ्नो समूहको शीर्ष स्थानमा उक्लिएका छन् ।
मंगलबार धरान रंगशालामा भएको पहिलो खेलमा लाइब्रेरी फुटबल क्लब भोजपुर लाई ५–१ ले पराजित गर्दै सम्राट स्पोर्टिङ क्लब मोरङ तीन अंकसहित समूह बीको शीर्ष स्थानमा उक्लिएको छ ।
सम्राट स्पोर्टिङका लागि हरि खवासले ह्याट्रिक गरे । उनले खेलको पहिलो हाफमा १ गोल र दोस्रो हाफाम २ गोल गर्दै ह्याट्रिक पूरा गरेका हुन् । उनी खेलको म्यान अफ द म्याच घोषित हुँदै नगद पाँच हजार पुरस्कार प्राप्त गरे ।
यस्तै, डेबिट मगर र अंकित लिम्बूले थप गोल गर्दै सम्राट स्पोर्टिङलाई ५–१ को फराकिलो जित दिलाए । भोजपुरका लागि सुशन तामाङले शान्तवना गोल फर्काएका थिए ।
समान तीन अंक भएको गाइघाट फुटबल क्लब गोल संख्याको आधारमा दोस्रो स्थानमा रहेको छ । समूह विजेताको टुंगो लगाउन बुधबार सम्राट स्पोर्टिङ र गाइघाट बीच समूह बी को अन्तिम खेल हुनेछ ।
भोजपुर भने लिगको दुवै खेलमा पराजित हुँदै घर फर्किएको छ ।
त्यस्तै मंगलबार नै भएको दोस्रो खेलमा धनकुटाको देउराली युथ क्लबलाई ३–० ले पराजित गर्दै झापाको धाइजन चारआली फुटबल क्लब तीन अंकसहित समूह सीको शीर्ष स्थानमा रहन सफल भएको छ ।
धाइजनका लागि सागर रसाइलीले २ गोल गरेका थिए भने निश्चल बस्नेतले १ गोल थपेका थिए ।
सागर रसाइली खेलको म्यान अफ द म्याच समेत घोषित हुँदै नगद पाँच हजार प्राप्त गरे ।
बुधबार समूह डी अन्तर्गत ताप्लेजुङको प्रगतिशील युथ क्लब र खोटाङको बुइपा–११ बीच पहिलो खेल हुने र समूह बी अन्तर्गत उदयपुरको गाइघाट फुटबल क्लब र मोरङको सम्राट स्पोर्टिङ क्लब बीच दोस्रो खेल हुने आयोजकले जनाएको छ ।
कोशी प्रदेश फुटबल संघको आयोजनामा फागुन ८ गतेसम्म सञ्चालन हुने प्रतियोगितामा ११ जिल्लाका जिल्ला लिग च्याम्पियन क्लबहरूको सहभागीता रहेको कोशी प्रदेश फुटबल सघका अध्यक्ष किशोर राईले जानकारी दिए ।
११ जिल्लाका जिल्ला च्याम्पियन क्लबहरूलाई चार समूहमा विभाजन गरिएको छ । समूह विजेताहरूले लिगको उपाधिका लागि पुनः खेल्नेछन् ।
लिगको विजेता र उपविजेता टिम राष्ट्रिय लिगको छनौटका लागि हुने अन्तर प्रादेशिक लिग खेल्न छनौट हुनेछन् ।
लिग विजेताले दुई लाख, उपविजेताले एक लाख ५० हजार, तेस्रो हुने टिमले एक लाख २५ हजार र चौथो हुने टिमले एक लाख नगद पुरस्कार प्राप्त गर्नेछन् ।
Discussion about this post