धरान : धरानमा जारी कोशी प्रदेश प्रिमियर लिग फुटबल प्रतियोगितामा समूह ए बाट समूह विजेता हुँदै पाँचथर युनाइटेड अन्तिम चारमा प्रवेश गरेको छ ।
बिहीबार धरान रंगशालामा भएको खेलमा संखुवासभाको लोहोरुङ फुटबल क्लबलाई १–० गोल अन्तरले पराजित गर्दै पाँचथर समूह विजेता बनेको हो । समूह विजेता भएसँगै पाँचथर लिगको अन्तिम चारमा प्रवेश गरेको छ ।
पाँचथरका लागि विजयी गोल सन्तोष सम्बाहाम्फेले गरेका थिए । खेलको म्यान अफ द म्याच पाँचथरका बेघम गुरुङ घोषित भए । उनलाई नगद पाँच हजार पुरस्कार प्रदान गरिएको थियो ।
समूह ए मा दुई टिम मात्रै भएकोले एकै खेलबाट समूह विजेताको टुंगो लागेको थियो । पराजित भएको लोहोरुङ भने प्रतियोगिताबाट बाहिरिएको छ ।
बिहीबार नै समूह सी अन्तर्गत भएको खेलमा इलामको रेड हर्ष क्लबलाई २–० गोल अन्तरले पराजित गर्दै धनकुटाको देउराली फुटबल क्लबले समूह विजेता हुने सम्भावना कायमै राखेको छ ।
समूह सी मा झापाको धाइजन चारआलीसँग पराजित भएको धनुकटा र एक खेल खेलेको धाइजनको समान ३ अंक भएको छ । शुक्रबार हुने रेड हर्ष क्लब इलाम र धाइजन चारआली फुटबल क्लबबीचको खेलबाट समूह विजेताको टुंगो लाग्ने छ ।
यस समूहमा रहेका तीनै क्लबको दोस्रो चरणमा पुग्ने सम्भावना छ ।
शुक्रबार धरान फुटबल क्लब र खोटाङको बुइपा–११ बीच पहिलो खेल हुनेछ भने इलामको रेड हर्ष क्लब र झापाको धाइजन चारआली फुटबल क्लबबीचको दोस्रो खेल हुनेछ ।
३ अंक भएको बुइपा र शून्य अंक भएको धरान दोस्रो चरण प्रवेशका लागि खेल्नेछन् । धरानले २ गोलको अन्तरमा बुइपालाई पराजित गर्दा मात्रै दोस्रो चरणमा पुग्नेछ भने बुइपा भने १ गोल अन्तरले पराजित हुँदा पनि दोस्रो चरणमा प्रवेश गर्नेछ ।
कोशी प्रदेश फुटबल संघको आयोजनामा फागुन ८ गतेसम्म सञ्चालन हुने प्रतियोगितामा ११ जिल्लाका जिल्ला लिग च्याम्पियन क्लबहरूको सहभागीता रहेको कोशी प्रदेश फुटबल सघका अध्यक्ष किशोर राईले जानकारी दिए ।
११ जिल्लाका जिल्ला च्याम्पियन क्लबहरूलाई चार समूहमा विभाजन गरिएको छ । समूह विजेताहरूले लिगको उपाधिका लागि पुनः खेल्नेछन् ।
लिगको विजेता र उपविजेता टिम राष्ट्रिय लिगको छनौटका लागि हुने अन्तरप्रादेशिक लिग खेल्न छनौट हुनेछन् ।
लिग विजेताले दुई लाख, उपविजेताले एक लाख ५० हजार, तेस्रो हुने टिमले एक लाख २५ हजार र चौथो हुने टिमले एक लाख नगद पुरस्कार प्राप्त गर्नेछन् ।
Discussion about this post