इटहरी : सुनसरीको दुहबी नगरपालिका–१२, पूर्वकुशाहा सिसुवास्थित एकता ज्ञान मैथिली आधारभूत विद्यालयमा शैक्षिक योग्यता नपुगेको व्यक्तिलाई विद्यालय सहयोगीमा नियुक्त गरिएको पाइएको छ।
विद्यालय व्यवस्थापन समितिका सदस्य रविन यादवकी श्रीमती दुर्गा यादवलाई कक्षा ८ पास अनिवार्य भनिएको सूचनाविपरीत नियुक्त गरिएको पाइएको हो।
विद्यालयले गत जेठ २२ गते प्रकाशित सूचनामा विद्यालय सहयोगी पदका लागि कक्षा ८ उत्तीर्ण अनिवार्य शर्त राखेको थियो। सोही अनुसार असार १४ गते दुहबी–५ स्थित सरस्वती माध्यमिक विद्यालयमा लिखित परीक्षा सञ्चालन गरिएको थियो।
परीक्षामा सहभागी कक्षा १२ उत्तीर्ण चार जना उम्मेदवारहरू, प्रीति राजवंशी, राधिका यादव, किरण यादव, र भागेश्वर यादवलाई पाखा लगाई दुर्गा यादवलाई एक नम्बरमा राख्दै अन्तरवार्तामा सहभागी गराएर नियुक्त गरिएको पाइएको हो।
उम्मेदवारहरूका अनुसार परीक्षाअघि नै प्रश्नपत्र दिइएको, उत्तर तयार गर्न समय दिइएको र सम्पूर्ण प्रक्रिया पहिले नै सेटिङ गरिएको आरोप लगाइएको छ। उनीहरू भन्छन्, “पहिचान, पहुँच र मिलेमतोका आधारमा हामी योग्य उम्मेदवारलाई पाखा लगाइयो।”
पीडित उम्मेदवारहरूले असार १७ गते अख्तियार दुरुपयोग अनुसन्धान आयोग, इटहरीमा उजुरी दिएका छन्। उजुरीमा दुहबी नगरपालिकाको शिक्षा शाखाले पनि मिलेमतोमा संलग्न भएको दाबी गरिएको छ। उनीहरूले न्यायिक छानबिन गरी दोषीलाई कानुनी कारबाही गर्नुपर्ने माग राखेका छन्।
दुर्गा यादवले पेश गरेको टेष्ट परीक्षा पास प्रमाण–पत्रमाको वैधतामाथि नै प्रश्न उठाउँदै उम्मेदवारहरूले छानविन हुनुपर्ने बताएका छन् ।
यता, विद्यालयकी प्रधानाध्यापक उर्मिलाकुमारी यादवले भने प्रक्रिया पूरा गरेर नगरपालिकाको निर्देशनमा नियुक्ति गरिएको बताइन्।
शिक्षा क्षेत्रमा पहुँच र प्रभावका माध्यमबाट नियुक्ति हुनुले शिक्षण संस्थामा जनविश्वास घटाउने जानकारहरू बताउँछन् ।
Discussion about this post