इटहरी : लागूऔषध ओसारपसारमा संलग्न दुई युवकलाई सुनसरी प्रहरीले पक्राउ गरेको छ।
विशेष सूचनाको आधारमा इलाका प्रहरी कार्यालय दुहवी र छिटाहाबाट खटिएको संयुक्त प्रहरी टोलीले गढी गाउँपालिका–४, छिटाहास्थित नहर नजिकबाट उनीहरूलाई पक्राउ गरेको हो।
प्रहरीका अनुसार उत्तरबाट दक्षिणतर्फ जाँदै गरेको स २ प ७१४६ नम्बरको मोटरसाइकल रोकेर चेकजाँच गर्दा उक्त मोटरसाइकलमा लोड गरिएको एउटा कालो झोला र १ वटा बोरा फेला परेको थियो।
ती बोरामा प्याक गरी ल्याइएको लागू औषध गाँजा २६ केजी बरामद गरिएको प्रहरीले जनाएको छ।
मोटरसाइकल चालक धनकुटा साँगुरीगढी गाउँपालिका–८ का १६ वर्षीय अतिस राई र पछाडि सवार १९ वर्षीय विशाल राईलाई पक्राउ गरी आवश्यक अनुसन्धानका लागि इलाका प्रहरी कार्यालय दुहवीमा राखिएको छ।
प्रहरीले बरामद गरिएको गाँजा र मोटरसाइकलसमेत नियन्त्रणमा लिएर घटना सम्बन्धी थप अनुसन्धान अगाडि बढाएको जनाएको छ।
Discussion about this post