बलात्कारबिरुद्ध इटहरीमा प्रदर्शन

इटहरी : पछिल्लो समय नेपालमा बलात्कारका घटना बढिरहेकाले यसको न्यूनीकरणका लागि इटहरीमा प्रदर्शन गरिएको छ ।

इटहरीको मुख्य चौकमा शुक्रबार बलात्कार बिरुद्ध प्रदर्शन गरिएको हो । इटहरीको पूर्व लाइनमा भेला भएका १ सय बढी युवतीहरुले शुक्रबार कालो कपडा लगाई टाउकोमा कालो पट्टी लगाएर बलात्कार बिरुद्ध प्रदर्शन गरेका हुन् ।

उनीहरुले बलात्कारीलाई हदै सम्मको कारबाहीको माग राख्दै ‘म असुरक्षित, म नारी’, ‘स्टप रेप’, ‘मेरो लूगा छोटो होइन, तिम्रो सोच छोटो’, ‘छोरीको इज्जत माथि खेलवाड नगर’, ‘सरकार बलात्कारीलाई सजाय देउ’, जस्ता प्ले कार्ड बोकेर प्रदर्शन गरिएको थियो ।

अभियानकर्ता संगिना राईले कोरोनाको संक्रमण भन्दा पनि बलात्कारको संख्या उच्च रहेको औल्याईँन् ।

उनले भनिन्, ‘कोरोनाको संक्रमण भन्दा पनि बलात्कार ज्यादा भईरहेको र यो गतिविधि नहोस् भन्ने उदेश्यले हामीले यो अभियान चलाएका हौँ ।’

बलात्कारीलाई कडा र भिन्न प्रकारको कारबाही हुनुपर्ने आँफूहरुको माग रहेको उनले बताईन् । ‘सोच बदलेमा बलात्कारका घटना निर्मूल हुन्छन् भन्ने हाम्रो बुझाई रहेको छ, अहिले सहर बजारमा राम्रोसँग हिड्ने वातावतरण पनि छैन,’ उनले टाकुरासँग भनिन् ।

पछिल्लो समय आफन्त र परिवारका सदस्यबाट नै धेरै बालबालिका बलात्कृत हुनु परेकाले यसको सजायका लागि संविधान संशोधन गरी कडा भन्दा कडा कानुनी व्यवस्था गर्नुपर्ने प्रदर्शनमा सहभागी भएकी मनिता चाम्लिङले बताईन् ।

उनले भनिन्, ‘पछिल्लो समय घरपरिवारबाटै पनि सुरक्षित हुने अवस्था छैन, बलात्कारीलाई हदैसम्मको कानूनी कारबाही नगरे हामी सुरक्षित हुनेदिन आउनेछैन ।’

कोरोना भाइरसको जोखिमको अवस्थामा पनि महिलामाथि दिनानुदिन बलात्कार भईरहेकाले समस्या रहेको उनले बताईन् ।