अब इटहरीको बेदान्त हस्पिटलमै हाडजोर्नीको अप्रशेन हुने

इटहरी : इटहरीमा रहेको बेदान्त हस्पिटलमा हाडजोर्नी तथा नशारोगको अप्रेशन हुने भएको छ । बेदान्त हस्पिटलले पहिलोपटक अप्रशेनको रुपमा हाडजोर्नी तथा नशारोगलाई सुरुआत गरेको जनाएको छ ।

हस्पिटलका प्रबन्ध निर्देशक इन्द्रबहादुर श्रेष्ठले सोही हस्पिटलमा सेवा प्रदान गर्दै आएका बरिष्ठ हाडजोर्नी तथा नशा रोग विशेषज्ञ डाक्टर रोविन श्रेष्ठ र डाक्टर धीरज सिंहको संयुक्त टिमले अप्रशेन गर्नेछन् ।

हाडजोर्नी तथा नशा रोग (अर्थोपेडिक) लाई सामान्य भाषामा हाडजोर्नी तथा नशा रोगसँग सम्बन्धित निदान, उपचार, माइनर तथा मेजर शल्यक्रिया C-arm machine प्रविधिबाट भाँचिएको हड्डिमा स्टिल वा के–वार राखी अप्रेशन गरिने श्रेष्ठले जानकारी दिए ।

उनका अनुसार हात खुट्टा भाँचिएको, हात वा खुट्टामा सिन्का बिजेको र मासु पलाएको, नङ गडिएको जस्ता समस्याको अप्रशेन गर्नुपरेमा अब धरान तथा विराटनगर जानै पर्दैन । बेदान्तमै बरिष्ठ हाडजोर्नी विशेषज्ञद्धारा सेवा प्रवाह हुने उनले बताए ।

हाल ट्रमा, स्पाईन हाडजोर्नीमा लाग्ने क्यान्सर, स्पोर्ट्स ईन्जुरी लगायत बिभिन्न विधाको विकास भइसकेकाले शरीरमा हाडजोर्नी जन्मजात हुने समस्या समेत समाधान हुने हस्पिटलले जनाएको छ ।

आवश्यक तत्वको कमी तथा गडबडी, उमेर, बाथ, संक्रमण, दैनिक क्रियाकलापका कारण, हाडजोर्नी तथा मांसपेसीमा लाग्ने क्यान्सर, ट्युमर लगायतका कारण पनि हाडजोर्नीको समस्या हुने डा. रोबिन श्रेष्ठ बताउँछन् ।

कुन उमेर समूहलाई कस्तो प्रकारको समस्या देखिन्छ ?

यो रोग युवा पुस्तामा चोटपटक तथा दुर्घटनाको कराणले बढी हुने देखिन्छ । बच्चा र बृद्ध उमेरमा भने रोगसंग लड्ने प्रतिरोधात्मक क्षमताको कमी र संक्रमणका कारणले समस्या बढी हुने देखिन्छ ।

कस्ता रोगका बिरामी बढी आउने गर्दछन् ?

बढी रुपमा ढाड दुख्ने र घुँडाका समस्या लिएर आउने बढी देखिन्छन् । ट्रमा सेन्टर हुनुले चोटपटकका बिरामी बढी आउने गरेका छन् ।

यसको उपचार पद्दति र प्रविधि कस्तो छ ?

बेदान्त हस्पिटलमा C-arm machine प्रविधिबाट भाँचिएको हड्डि हरुमा स्टिल वा के–वार राखी अप्रेशन गरिन्छ । शरीरमा गाँठा–गूँठी, मुसा वा खिल भएको, मासु पलाको, हड्डीलाई ठाउँमा ल्याउने समस्या, घुँडाको जोर्नी प्रत्यारोपण गर्न सक्ने सम्मको प्रविधि र जनशक्ति रहेको छ । ढाडमा स्पाईनल कर्डमा समस्या नदेखिएको खण्डमा ढाड बाङ्गिने, कुप्रिने समस्या पूर्ण रुपमा निको पार्ने उपचार पद्दति रहेको हस्पिटलले जनाएको छ ।

यहाँका गरीब तथा निमुखाहरुका लागि न्यून शुल्कमा सेवा प्रदान गर्दै आएका कारण पनि पछिल्लो समय बेदान्त हस्पिटल बिरामीहरुको रोजाइमा पर्न थालेको प्रबन्ध निर्देशक श्रेष्ठ बताउँछन् ।

उक्त हस्पिटलमा फेमिली फिजिसियन, मुटु तथा प्रेसर रोग, स्त्री तथा प्रसुति रोग, बाल तथा नवजात शिशु रोग, नाक कान तथा घाँटी रोग, जनेरल सर्जन लगायतका विभिन्न रोगको उपचार गरिदैँ आएको छ ।