तरहरा : दुवै मृगौला फेल भएर उपचारको क्रममा रहेकी इटहरी १९ तरहराकी मालती सुन्दासको परिवारले सहयोगको याचना गरेको छ ।
विगत तीन वर्षदेखि मृगौलामा समस्या देखिएकी ५४ वर्षीय सुन्दासको हाल धरानस्थित वीपी कोइराला स्वास्थ्य विज्ञान प्रतिष्ठानमा उपचार भइरहेको छ ।
परिवारको आर्थिक अवस्था अत्यन्तै नाजुक भएकाले उपचारमा कठिनाइ भइरहेको उनका श्रीमान मुक्ति सुन्दासले जानकारी दिए । विगत लामो समयदेखि मुटुरोगको समस्याबाट पीडित रहेकी सुन्दासका दुवै मृगौलाले समेत काम गर्न छाडेपछि स्वास्थ्य अवस्था जटिल बन्दै गएको छ ।
हप्तामा दुई चोटी गर्नुपर्ने डाइलासिस आर्थिक अभावका कारण हाल एकपटक मात्रै गराइरहेको मुक्तिले बताए । परिवारसँग भएको सबै घर जग्गा समेत श्रीमतीकै उपचारका कारण सकिएकाले हाल आफूहरु भाइको घरमा बसिरहेको उनको भनाइ छ ।
यसअघि उनले आफन्त तथा नरनातालाई समेत खर्चका लागि गुहारेका थिए ।
कोरोना महामारीका कारण जारी लकडाउनले उपचार खर्च जोहो गर्न निक्कै अप्ठ्यारो भएको उनले बताए । मृगौला पीडितका लागि भन्दै सरकारले केही सहजीकरण गरेको भए पनि महङ्गो औषधीहरु आफैँ किन्नुपर्ने बाध्यता रहेकोले पनि सहयोगको याचना गर्नुपरेको उनको दुखेसो छ ।
विगत तीन वर्षदेखि मृगौलामा समस्या देखिएसँगै भारतको सिलिगुडीमा उपचार गराउँदा परिवारसँग भएको रकम सकिएपछि उनलाई उपचार गराउन खर्च अभाव भएको हो । ५४ वर्षीय सुन्दासको हाल दुवै मृगौलाले काम गर्न छाडेका कारण स्वास्थ्य अवस्था जटिल बन्दै गएको हुँदा जीवन रक्षाको लागि सहयोग गरी दिन परिवारले अपिल गरेका हुन् ।
सहयोग गर्न चाहनेहरूले उनका श्रीमान् मुक्ति सुन्दासको सम्पर्क नम्बर ९८०३७२८६२० मा सम्पर्क गरिदिन अनुरोध गरेका छन् ।
साथै, उनका श्रीमान् मुक्तिबहादुर दर्जी (मुक्ति सुन्दास) को नाममा नबिल बैंक तरहरा शाखामा रहेको खाता नम्बर ११९१००१७५०१६७६ मा रकम जम्मा गरेर सहयोग गर्न सकिने परिवारले जनाएको छ ।
Discussion about this post