इटहरी : नेपाल विद्युत प्राधिकरणले इटहरीमा पनि इन्टरनेटको तार काटेको छ ।
विद्युत प्राधिकरण इटहरी शाखाका प्रमुख सुरेन्द्रकुमार साहका अनुसार अप्टिकल फाइबर लगायत संरचना प्रयोग गरेर भाडा नतिर्ने इन्टरनेट, केबल टेलिभिजन सेवा प्रदायकहरूको लाइन काट्न सुरू गरिएको छ । आइतबार प्राधिकरणले इटहरी २ नं. वडामा तार काटेको साहले जानकारी दिए ।
पोल प्रयोगको सम्झौता नवीकरण गर्न नआएका इन्टरनेट कम्पनीको तार काट्ने काम सुरु भएको उनको भनाइ छ ।
‘बक्यौता बुझाउन र सम्झौता नवीकरण गर्न प्राधिकरणले पटक–पटक सूचना जारी गर्दा बेवास्ता गरेपछि केन्द्रको निर्देशन अनुसार लाइन काट्न थालेका हौँ,’ उनले भने, ‘यो सँगै इटहरी ८ को भूर्की र इटहरी १९ भवानीपुरमा समेत लाइन काटिएको छ ।’
उनका अनुसार वर्डलिङ्क, भायनेट, आईजोन, असुहाङ र सुनसरी केवलको लाइन काटिएको छ । प्रक्रियामा नआएकाहरूको लाइन काट्दै जाने उनले बताए । प्राधिकरणको पोलमा तार टाँगेर पनि प्रक्रियामा नआएपछि तार काट्नुको विकल्प नरहेको उनको भनाइ थियो ।
यता, प्राधिकरणले भाडा तोक्दा सेवा प्रदायकको लागत र प्रतिफलको अध्ययन नगरेको, बजार अवस्था लगायत विषयमा सरोकारवाला निकायसँग छलफल नै नगरी भाडा बढाएको भन्दै व्यवसायीहरुले भने आपत्ती जनाएका छन् ।
आफूले बढाएको पोल भाडा नतिरेको भन्दै नेपाल विद्युत प्राधिकणले शनिबारदेखि देशभर विभिन्न स्थानमा इन्टरनेटको तार काट्नु नाजायज भएको पशुपति केबल इटहरीका सञ्चालक मुकुन्द भट्टराईले बताए । व्यवसायीहरू दोहोरो मार्कामा पर्दै आएको भन्दै बिना अनुगमन लाइन काट्ने काम भएको उनको आरोप छ ।
व्यवसायीहरूले विद्युत प्राधिकरण र टेलिकमलाई शुल्क तिर्नु पर्ने बाध्यता हटाउनु पर्ने उनको माग छ ।
Discussion about this post