एकैदिन भएको छुट्टा–छुट्टै दुर्घटनाबाट सातजनाको मृत्यु, एउटै मोटरसाइकलमा सवार तीनैजनाको मृत्यु

इटहरी : एकैदिन मोरङ, झापा र उदयपुरमा भएको छुट्टा–छुट्टै सवारी दुर्घटनाबाट सात जनाको मृत्यु भएको छ भने सातजना घाइते भएका छन् ।

प्रदेश १ प्रहरी कार्यालय विराटनगरका अनुसार शनिबार (हिजो) बेलुका ६ बजे मोरङको केराबारी गाउँपालिका ९ बेलचौरी स्थितमा उत्तरबाट दक्षिणतर्फ आउँदै गरेको को ४० प १७२७ नम्बरको मोटरसाइकल र बिपरीत दिशाबाट जादै गरेको बा १० च ४३०० नम्बरको स्कारपियो एक आपसमा ठक्कर भएर दुर्घटना हुँदा मोटरसाइकलमा सवार तीनजना मध्ये दुईजनाको घटनास्थलमै र एक जनाको उपचारको क्रममा मृत्यु भएको छ ।

मृत्यु हुनेमा चालक लेटाङ नगरपालिका २ का ३० वर्षीय कमल कार्की र पछाडी सवार पथरीशनिश्चरे नगरपालिकाका ५५ वर्षीय तिलक बहादुर सुबेदीको घट्नास्थलमा मृत्यु भएको हो ।

यस्तै, पछाडि सवार लेटाङ नगरपालिका २ कि ४५ वर्षीया सीता कार्कीको धरानस्थित वीपी कोइराला स्वास्थ्य विज्ञान प्रतिष्ठानमा मृत्यु भएको प्रहरीले जनाएको छ । स्कारपियो र चालक लेटाङ नगरपालिका २ का ४७ वर्षीय पुष्प बहादुर मगर इलाका प्रहरी कार्यालय बेलबारीको नियन्त्रणमा रहेका छन् ।

यस्तै, हिजो बेलुका पौने ६ बजे मोरङ रंगेली नगरपालिका ६ टकुवा–पीपल चौक भित्री सडक खण्डमा साइकल यात्री मोरङ सुनवर्षी नगरपालिका ६ पटियापाडा का ३० वर्षीय सत्रुघन साहको साइकल आफैं अनियन्त्रित भइ दुर्घटना हुँदा मृत्यु भएको छ ।

यस्तै, हिजो बेलुका ६ बजे उदयपुरको त्रियुगा नगरपालिका ११ मेन चोक स्थितमा पूर्वतर्फ आउँदै गरेको स १ ह १६२० नम्बरको अटो र पीपलचोकबाट पूर्व तर्फ जादै गरेको को १९ प ९६४६ नम्बरको मोटरसाइकल एक आपसमा ठक्कर भएर दुर्घटना एक जनाको मृत्यु भएको छ भने २ जना घाइते भएका छन् ।

मृत्यु हुनेमा मोटरसाइकल पछाडि सवार त्रियुगा नगरपालिका ११ का ८५ वर्षीय कुलप्रसाद भण्डारी रहेका छन् । उनको न्यूरो अस्पताल विराटनगरमा उपचारको क्रममा राति साढे ९ बजे मृत्यु भएको प्रहरीले जनाएको छ । मोटरसाइकल चालक सप्तरी कंचनपुर नगरपालिका १२ का ५२ वर्षीय कमल प्रसाद पोखरेल र अटो चालक उदयपुर चौदण्डीगढी नगरपालिका ७ का ४२ वर्षीय नरबहादुर कार्की सामान्य घाइते भएका छन् ।

उनीहरूको जिल्ला अस्पताल उदयपुरमा उपचार भइरहेको प्रहरीले जनाएको छ । दुवै सवारी साधन जिल्ला प्रहरी कार्यालय उदयपुरको नियन्त्रणमा रहेको छ ।

यता, झापाको बिर्तामोड नगरपालिका ६ गिरीबन्दु टि स्टेट अगाडि पूर्व–पश्चिम राजमार्गमा तत्काल नम्बर नखुलेको रातो रंगको २२० सिसि पल्सर मोटरसाइकल र बिपरीत दिशा तर्फ जादै गरेको प्र १–०१–०१४ प ६००७ नम्बरको स्कुटर एक आपसमा ठक्कर भएर दुर्घटना स्कुटर चालक मेची नगरपालिका १० का ४२ वर्षीय डिल्ली कार्की, पछाडि सवार उनका छोरा १६ वर्षीय मनिष कार्की र अर्को मोटरसाइकल पछाडि सवार झापा हल्दिबारी गाउँपालिका २ का २१ वर्षीय पिजेश लामा घाइते भएका थिए ।

उनीहरूमध्ये स्कुटरमा पछाडि सवार रहेका मनिषको राति ९ बजे उपचारको क्रममा मृत्यु भएको छ । दुर्घटनामा सम्लग्न रहेको अर्को मोटरसाईकल चालक झापा हल्दिबारी गाउँपालिका २ का २५ वर्षीय उमेश लामा मोटरसाइकलसहित फरार रहेकाले खोज तलास भइरहेको प्रहरीले जनाएको छ ।

यस्तै, हिजो राति साढे ११ बजे झापा मेचीनगर नगरपालिका १३ तेलिबारी स्थित पूर्व–पश्चिम राजमार्गमा पुर्व तर्फ जादै गरेको प्रदेश १–०४–०१४ प ३३४५ नम्बरको मोटरसाइकल र सोही दिशातर्फ जाँदै गरेको प्रदेश १–०४–००१ प ३९९५ नम्बरको मोटरसाइकल ठक्कर भएर दुर्घटना हुँदा चारजना घाइते भएका छन् ।

घाइतेहरूमा ३३४५ नम्बरको मोटरसाइकलमा सवार मेचीनगर नगरपालिका ८ का २१ वर्षीय अनिष गिरी, पछाडि सवार सोही स्थानका १८ वर्षीय अभिषेक श्रेष्ठ, ३९९५ नम्बरको मोटरसाइकल चालक मोरङ उर्लाबारी

नगरपालिकाका २१ वर्षीय निकेश शिवाकोटी र पछाडि सवार झापा मेचीनगर नगरपालिका ८ का २१ वर्षीय प्रबिण मेचे रहेका छन् । घाइतेमध्ये अभिषेक श्रेष्ठको उपचारको क्रममा राति साढे १२ बजे मृत्यु भएको प्रहरीले जनाएको छ ।

बाँकी ३ जना घाइतेहरुको उपचार भइरहेको प्रहरीले जनाएको छ ।