इटहरी : सुनसरीको दुहबीमा तीनजना सवार रहेको मोटरसाइकल र पिकअप एकआपसमा ठक्कर हुँदा एक युवकको मृत्यु भएको छ ।
मंगलबार (आज) दिउँसो साढे १२ बजेको समयमा दुहबी नगरपालिका ३ फुटानी चोकस्थित कोशी राजमार्गमा उत्तरबाट दक्षिणतर्फ आएर पश्चिमतर्फ बाटो क्रस गर्दै गरेको को १ च ७१८६ नम्बरको ग्याँस बोकेको पिकअप गाडीसँग दक्षिणबाट उत्तरतर्फ जाँदै गरेको प्रदेश नं. १–०४–००१ प ८१३८ नम्बरको मोटरसाइकल एकआपसमा ठक्कर भएर दुर्घटना भएको प्रहरीले जनाएको छ ।
दुर्घटनामा मोटरसाइकल चालक मोरङको धनपालथान गाउँपालिका २ बस्ने अन्दाजी २० वर्षीय धीरज मण्डलको मृत्यु भएको हो ।
यस्तै, मोटरसाइकलमा सवार २० वर्षीय अनिल देव, सोही ठाउँ बस्ने १६ वर्षीय चक्र देव घाइते भएका छन् । उनीहरूको विराट नर्सिङ अस्पतालमा उपचार भइरहेको प्रहरीले जनाएको छ ।
पिकअप चालक दुहबी ८ बस्ने २७ वर्षीय वीरनारायण चौधरी इलाका प्रहरी कार्यालय दुहबीको नियन्त्रणमा रहेका छन् ।
घटनाबारे थप अनुसन्धान भइरहेको प्रहरीले जनाएको छ ।
Discussion about this post