विराटनगर : विराटनगर महानगरपालिकाले पनि बजार क्षेत्रमा निर्माण गरिएका अवैध संरचना हटाउन थालेको छ ।
बुधबार (आज) विराटनगर ९ स्थित महानगरका मेयर नागेश कोइरालाकै घरमा पसल सञ्चालकहरूले सडकपेटी अतिक्रमण गरी बनाइएका संरचनाहरूमा डोजर चलाइएको छ ।
जलजला रोडस्थित कोइरालाले भाडामा लगाएका पसल सञ्चालकले सटर अगाडि आफूखुसी निर्माण गरेका संरचना हटाएर अभियानको सुरु गरिएको छ ।
नगर प्रहरीका प्रमुख राजन पौडेलको नेतृत्वमा डोजरसहित पुगेको नगर प्रहरीले पसल अगाडि निर्माण गरेको सेटब्याक लगायतका अवैध संरचना हटाएको छ । नगर प्रहरीले जथाभावी झुण्ड्याइएका होडिङ बोर्डसमेत हटाएको थियो ।
विराटनगरलाई सफा, सुन्दर, व्यवस्थित र विकसित बनाउने महानगरको अभियानअन्तर्गत बजार क्षेत्रमा निर्माण गरिएका संरचना हटाउन सुरु गरिएको महानगरका मेयर नागेश कोइरालाले बताए ।
उनले ३५ दिने सूचना जारी गर्दा पनि व्यापारीहरुले अटेर गरेपछि बल प्रयोग गरेर हटाउनु परेको प्रस्ट पारे । ‘परिवर्तन गर्न आफैंबाट सुरु गर्नुपर्छ भन्ने भनाइलाई चरिचार्थ गर्दै मेरै घरमा रहेका पसल सञ्चालकले बनाएका अवैध संरचना हटाएर अभियान सुरु गरेका छौं,’ उनले भने ।
महानगरले बजार क्षेत्रभित्र सौन्दर्यकरण, दुर्घटना न्यूनीकरण तथा फुटपाथ नियन्त्रणका लागि भन्दै गत कात्तिक ३ गते सार्वजनिक सूचना जारी गरेको थियो ।
Discussion about this post