इटहरी : सुनसरीमा प्रहरीले स्वीप अपरेसन गरी १२० जना व्यक्तिलाई नियन्त्रणमा लिइएको छ।
जिल्ला प्रहरी कार्यालय सुनसरी र मातहतका विभिन्न इकाइहरूबाट संयुक्त रूपमा स्वीप अपरेसन गरी सो संख्यामा नियन्त्रणमा लिइएको हो।
खासगरी लागूऔषध बिक्री–वितरण, सेवन तथा समाजमा अशान्ति फैलाउने गतिविधिमा संलग्न व्यक्तिहरूमाथि कारबाही केन्द्रित गरिएको प्रहरीले जनाएको छ।
नियन्त्रणमा लिइएकामध्ये ११५ जना पुरुष र ५ जना महिला रहेका छन्। तीमध्ये १५ जनालाई सुधार केन्द्र पठाइएको छ। जसमा १० जना पुरुष र ५ जना महिला रहेका छन्। यस्तै, ७६ जनालाई सम्झाई–बुझाई आफन्तको जिम्मा लगाइएको छ।
प्रहरीका अनुसार लागूऔषध सम्बन्धी मुद्दामा २ जना पुरुषविरुद्ध मुद्दा दर्ता गरिएको छ भने सोही मुद्दामा संलग्न एक जना फरार प्रतिवादीको खोजी भइरहेको छ। साथै, २६ जनामाथि थप अनुसन्धान जारी रहेको छ।
अपरेसनका क्रममा २६.५६ ग्राम ब्राउनसुगर र ४४ पिस ट्याब्लेट बरामद गरिएको प्रहरीले जनाएको छ।
प्रहरीले यस्ता गतिविधिविरुद्ध आगामी दिनमा पनि कडाइका साथ अभियान सञ्चालन गर्ने जनाएको छ।
Discussion about this post