इटहरी : विराटनगरको रानीदेखि धरानसम्मको ४९ किलोमिटर ६ लेन सडकको निर्माणमा चरम लापरबाही भएको पाइएको छ ।
६ लेन सडक निर्माणको क्रममा पटकपटक विवादसमेत हुँदै आएको छ । कतै गुणस्तरीय काम नभएको, कतै काम थालेपनि अलपत्र पारेको, कतै लामो समयसम्म ठेकदार कम्पनी गैरजिम्मेवार बनेको, सडक निर्माण थालेर काम सम्पन्न नगर्दा स्थानीयबासीले राखेको समस्याबारे सडक आयोजना बेखबरजस्तै बनेकोजस्ता समस्या ६ लेन आयोजनाले खेप्दै आएको छ ।
यसैबीच इटहरी उपमहानगरपालिका वडा नं. १ मा शुभप्रभात टोल विकास समितिमा पर्ने ‘स्ल्याब’ भत्काएको सात वर्ष बितेपनि अझै नबन्दा स्थानीयबासी आजित बनेका छन् । ६ लेन परियोजनाले सडक निर्माणका क्रममा भत्काएको सात वर्ष बितेपनि अझैसम्म ‘स्ल्याब’ निर्माण नहुँदा दुर्घटनाको समेत जोखिम बढेको स्थानीयबासी बताउँछन् ।
स्थानीय सीता नेपालले अरु ठाउँमा सडकसहित ‘स्ल्याब’ बनेपनि यही ठाउँमात्र बनाउन बाँकी रहेको बताइन् ।
‘हामीले पटकपटक जानकारी गराएपनि कहिले पैसा पुगेन, कहिले गिटी, बालुवा झरेन, कहिले कताकता फोन गर्दै पन्छिने गरेका छन्,’ उनले भनिन्, ‘मानव बस्तीमा जाने स्ल्याब नबन्दा फड्के लगाइएको छ, फड्केबाट कयन पटक दुर्घटनासमेत भयो ।’
स्थानीय बासिन्दाले घर, समाजबाट ‘हाइवे’ सडकसम्म आइपुग्नका लागि ‘फड्के’ लगाएका छन् । तर, ‘फड्के’बाट पटकपटक दुर्घटना भइसकेपनि सम्बन्धित निकाय मूकदर्शक बनेको उनको भनाइ छ ।
‘केही दिनअघि मात्रै यहीँको एकजना दिदी फड्केबाट लडेर नालीमा खस्नुभयो, गहिरो नालीमा परेका कारण घाइतेसमेत हुनुभयो, धन्न ज्यानै गएन,’ उनले भनिन्, ‘एक महिनाअघितिर साँझको समयमा पानी परिरहेको थियो । एकजना साइकलबाट आउँदै गरेका भाइपनि लड्नुभयो, उहाँलाई पनि धन्न प्रहरीको सहयोगमा उद्वार गरियो ।’
मान्छे लडेर थप जोखिम बढेको विषयमा पनि पटकपटक ६ लेन आयोजनालाई जानकारी गराइएपनि निर्माणमा चासो नदिएको उनले बताइन् ।
‘यति स्ल्याब बन्नका निम्ति मान्छेको ज्यानै जानुपर्नेजस्तो देखियो,’ नेपालको दुःखेसो छ, ‘यहाँ मान्छे लड्दा केही नहुने रहेछ, स्ल्याब बन्नका निम्ति मान्छे नै मर्नुपर्नेरहेछ ।’
स्थानीय चिन्तामणी सापकोटाले १६ फुटे बाटोमा घर हुनेहरू घुमेर अर्कै बाटोबाट आउनुपर्ने बताए । ‘आफ्नो घर आउनका निम्ति अरुतिरैबाट घुमेर आउनुपर्छ । एक, दुई महिना होइन, सात वर्ष बितिसक्यो,’ उनले भने, ‘सडक विभाग र ठेकदार कम्पनीको चरम लापरबाहीका कारण माछेको ज्यानै जाने जोखिम भइसक्यो ।’
उनले स्कूले बालबालिका, वृद्ववृद्वा, कार्यालय जाने मानिसहरूसहित स्थानीय सर्वसाधारणसमेत स्ल्याब नबन्दा आजित बनेको सुनाए ।
इटहरीको हलगडा चोकमा रहेको प्रहरी बिटबाट आउने पहिलो बाटोको स्ल्याब नबन्दा तीन दर्जन बढी घरपरिवार समस्यामा रहेको उनको भनाइ छ । आँफूहरूले पटकपटक सम्बन्धित निकायसहित स्थानीय जनप्रतिनिधिहरूलाई जानकारी गराएपनि बेवास्ता गरेको सापकोटाको गुनासो छ ।
‘यतिखेरसम्म यो बाटो पिँच भइसक्थ्यो, हामीले विभिन्न ठाउँमा बजेट माग्दा पहिला स्ल्याब बनाएर आउनु भन्ने गरेका छन्,’ सापकोटा भन्छन्, ‘पहिले स्थानीयकै सहयोगमा बनेको स्ल्याब ६ लेन सडक निर्माण गर्ने क्रममा भत्काइयो, अहिले लथालिङ्ग छ ।’
उनै सापकोटासहितको टोलीले ६ लेन सडक आयोजनामा ‘डेलिगेसन’ समेत गएको छ । सापकोटासहित बालकृष्ण विष्ट, रोशन अधिकारी, विशुधन राईसहितको टोलीले आयोजनामा चाँडै ‘स्ल्याब’ निर्माण गर्न निवेदन दिएको छ ।
आयोजनाले भने कान्छाराम कन्ट्रक्सनक्शनले ठेक्का लिएको तर काम नसकेको जानकारी गरायो । निवेदन बुझ्दै आयोजनाले १५ दिनभित्र काम सुरु गर्न निर्देशन दिएपनि ठेकदार कम्पनी कान्छाराम कन्ट्रक्शन भने निर्माणको कामदेखि पन्छिदैँ आएको छ ।
६ लेन सडकमै पर्ने हाइवेमै गिटी, बालुवा थुपार्ने तर काम नगर्दा सवारीसाधन आवतजावतमा समेत समस्या हुँदै आएको स्थानीयबासीको गुनासो छ । उता, ठेकदार कम्पनीसँग यस विषयमा बुझ्दा सम्पर्क हुनसकेन ।
Discussion about this post