बराहक्षेत्र : बराहक्षेत्र नगरपालिकाको कार्यपालिका बैठकले वडा नं. ६ स्थित महेन्द्रगेटदेखि मुनाल चौकसम्मको सडकको दायाँ–बायाँ नाला मिचेर बनेका संरचना हटाउने निर्ण गरेको छ ।
यहाँको मुनाल चौकदेखि चक्रघट्टी बसपार्कसम्मको सडकलाई कम्तिमा ६५ फिट कायम गर्ने सर्वसहमतिले निर्णय गरेको हो ।
निर्णयअनुसार नै नगरपालिकाले नाला मिचेर बनेका संरचना हटाउन कार्तिक २३ गते ३५ दिने सार्वजनिक सूचना जारी गरेको थियो ।
महेन्द्रगेटदेखि चक्रघट्टी बसपार्कसम्मको सडकलाई व्यवस्थित तथा सुन्दर बनाउने नगरपालिकाको योजना र सडक विस्तार तथा सौन्दर्यीकरण गर्ने कार्यक्रमअनुसार मिचेर बनेका संरचना हटाउन नगरपालिकाले संस्थागत निर्णय गरेको नगर प्रमुख रमेश कार्कीले बताए ।
संघीय सरकारको नया सहर बनाउने योजनाअन्तर्गत बराहक्षेत्र नगरपालिका प्राथमिकता परेको तथा एक करोड बजेटसमेत बिनियोजन भएको बताइएको छ ।
महेन्द्रगेटदेखि मुनाल चौकसम्म साइकल लेनसहितको सुन्दर सडक बनाउने योजनासहित नाला मिचेर बनेका संरचना हटाउने निर्णय भएको नगर प्रमुख कार्कीले बताए ।
उक्त क्षेत्रमा १० प्रतिशतले नाला मिचेर संरचना बनाएको उनको भनाइ छ । उनकाअनुसार मुनाल चौकदेखि बसपार्कसम्म कम्तिमा ६५ फिट कायम गरिनेछ ।
यसअघि गत जेठमा नगर प्रमुख कार्कीले कार्यपालिकाबाटै निर्णय गराएर वडा नं. ५ कालाबञ्जरको हैटा खोलामा ४० वर्षदेखि अतिक्रमण गरेर बनेका संरचना समेत हटाइएको थियो ।
Discussion about this post