इटहरी : इटहरी निवासी, गीतकार गायत्री लम्सालको ‘हारे आफैँसँग’ गीती सङ्ग्रह लोकार्पण भएको छ ।
बुधबार इटहरीमा एक कार्यक्रमबीच नेपाली लोक जीवनका गीत समेटिएको लम्सालको हारे आफैँसँगको गीती सङ्ग्रह लोकार्पण गरिएको छ । गीती सङ्ग्रह गीतकार विजय श्रेष्ठ, शिक्षासेवी तथा साहित्यकार लेखनाथ घिमिरे, प्रा.डा. बद्रीविशाल पोखरेललगायतले लोकार्पण गरे ।
समाजमा सकारात्मक प्रेरणाका लागि प्रेरित गर्ने सोचले रचना गरिएका लम्सालको गीती सङ्ग्रहमा ८४ वटा गीत समावेश गरिएको छ । लम्सालले गीती सङ्ग्रह सार्वजनिक काक्रममा महत्वपूर्ण १२ वटा गीत प्रस्तुत गरे ।
लम्सालका यसअघि दुईवटा कृति आकाश हेर्दै दोबाटो २०६९ र पानीको रंग २०७५ सार्वजनिक भइसकेका छन् । दोस्रो कृति प्रकाशनपछि लम्सालको बढी संगत गीतकारसँग भएकाले गर्दा गीत रचनामा लागेको बताए ।
कार्यक्रमका प्रमुख अतिथि श्रेष्ठले नेपालीपनका गीत भएकाले गर्दा सारै मन परेको बताए । ‘जसरी ऐनामा व्यक्तिको अनुहार देखिएजस्तै गीतमार्फत समाजको अनुहार देखिएको छ,’ उनले भने ।
कार्यक्रममा कवि मनु मञ्जिलले लम्सालको गीती सङ्ग्रहमा समावेश भएका गीत राष्ट्रिय धरातल टेकेर रचिएको बताए । ‘लोक जनजीवनका गीतका रचनाकार लम्सालले एक से एक रचना गरेको पाइयो,’उनले भने ।
कार्यक्रममा शिक्षासेवी तथा साहित्यकार घिमिरेले लम्सालको गीत रचनामा अब्बल रहेको जनाए । सो क्रममा डा. पोखरेलले समाजलाई सकारात्मक ढंगले गीतमार्फत लम्सालले प्रेरित गरेको र सामाजिक विकृतिलाई पनि व्यङ्ग्य गरेको उल्लेख गरे ।
सगरमाथा साहित्य प्रतिष्ठान कोशी प्रदेशको आयोजनामा भएको कार्यक्रम मिश्रा गुरुङको अध्यक्षतामा सम्पन्न भएको थियो ।
Discussion about this post