इटहरी : स्व. कृष्णप्रसाद भट्टराई स्मृति गोल्डकपको दोस्रो क्वाटरफाइनल खेलमा केराबारी फुटबल क्लबसँग आयोजक द योङ ब्रदर्श क्लब इटहरी स्तब्ध बनेको छ ।
शुक्रबार भएको क्वाटरफाइनल खेलमा केराबारीले आयोजकलाई ४–३ गोल अन्तरले पराजित गर्दै सेमिफाइनलका लागि सिट सुरक्षित गरेको हो ।
खेलको ३ मिनेटमै आयोजकका लागि फासाले १ गोल गर्दै टिमलाई अग्रता दिलाए । लगत्तै खेलको ७ औँ मिनेटमा केराबारीका भुवन बस्नेतले जवाफी गोल फर्काए ।
खेलको १० मिनेटमै पुनः आयोजकका तर्फबाट फासाले नै गोल थपे । पहिलो हाफको इञ्जुरी समयमा केराबारीका लागि नितेश लिम्बूले थप १ गोल गरे । पहिलो हाफमा २–२ बराबरीमा टुंगिएपनि हाफपछि भने केराबारीले २ गोल थप्यो ।
प्रतिस्पर्धात्मक भएको खेल रोमाञ्चक बन्दा खेलाडीहरू उत्साहित बने ।
खेलको ५० औँ मिनेटमा केराबारीका लागि नितेश लिम्बूले पुनः १ गोल गर्दै टिमलाई अग्रता दिलाए ।
यसैगरी खेलको ५५ औँ मिनेटमा केराबारीकै लागि विशाल तामाङले थप १ गोल गरे । यसैगरी आयोजकका लागि खेलको ५७ औँ मिनेटमा उमेश राईले थप १ गोल गरे ।
खेलको म्यान अफ दि म्याच केराबारीका नितेश लिम्बू घोषित हुँदै नगद पाँच हजार प्राप्त गरे ।
कोशी प्रदेशस्तरीय प्रतियोगिता बिहीबार इटहरी ५ स्थित जनता बहुमुखी क्याम्पसको खेल मैदानमा उद्घाटन भएको हो ।
उद्घाटन खेलमा दमक एकेडेमीले न्यू स्टार क्लब बराहक्षेत्रलाई १–० गोल अन्तरले पराजित गर्दै सेमिफाइनलमा प्रवेश गरिसकेको छ ।
आयोजक द योङ ब्रदर्श क्लबका अध्यक्ष विजय सुब्बाका अनुसार प्रतियोगिताको विजेता टिमले नगद दुई लाख ५० हजार प्राप्त गर्नेछ । उपविजेता टिमले नगद एक लाख ३० हजारमा चित्त बुझाउनेछ ।
अघिल्लो वर्ष विजेतालाई दुई लाख २२ हजार प्रदान गरिएको थियो भने उपविजेताले एक लाख ११ हजार रुपैयाँ प्राप्त गरेका थिए । तर, यस वर्ष पुरस्कार राशि बढाइएको उनले बताए ।
प्रत्येक खेलको म्यान अफ दि म्याच हुने खेलाडीलाई नगद पाँच हजार प्रदान गरिनेछ ।
यसैगरी विधागततर्फ सर्वोत्कृष्ट खेलाडीलाई नगद १० हजार, उत्कृष्ट गोलरक्षकलाई नगद १० हजार, उत्कृष्ट डिफेन्डरलाई नगद १० हजार, उत्कृष्ट मिड फिल्डरलाई नगद १० हजार, उत्कृष्ट स्ट्राइकरलाई नगद १० हजार र सर्वाधिक गोलकर्ता खेलाडीलाई नगद १० हजारसहित ट्रफी र मेडलसहित प्रमाणपत्र वितरण गरिने खेल संयोजक एवम् क्लबका संरक्षक विकास केसीले जानकारी दिए ।
प्रतियोगितामा २२ लाख ५५ हजार रुपैयाँ खर्च हुने अनुमान गरिएको उनले जनाए । शनिबार लोहोरुङ फुटबल क्लब संखुवासभा र चारतारे युथ क्लब मोरङबीच प्रतिस्पर्धा हुनेछ ।
Discussion about this post