इटहरी : सुनसरीमा अपहरणमा परेकी बालिकाको बिहीबार सकुशल उद्दार गरिएको छ ।
जिल्ला प्रहरी कार्यालय सुनसरीका प्रहरी उपरीक्षक (एसपी) सुमन कुमार तिम्सिनाका अनुसार बुधबार दिउँसो १ः४० बजेतिर कोशी गाउँपालिका वडा नं. ७ मुसहरी टोल बस्ने कुशेश्वर सदाकी सात वर्षीया छोरी ईशु सदालाई घर अगाडि खेल्ने क्रममा अपरिचित मानिसले सिटी सफारी चढाएर अपहरण गरेको प्रहरीमा सूचना आएको थियो ।
उक्त सूचनाका आधारमा डीएसपी योगराज खतिवडाको नेतृत्वमा टोली परिचालन भएको थियो ।
खतिवडाको कमाण्डमा ९ सदस्यीय अनुसन्धान टोली गठन गरी कोशी प्रदेश प्रहरी कार्यालय विराटनगरबाट ‘प्रोभिन्स इन्भेस्टिगेसन टिम’समेत परिचालन भएको थियो ।
अपहरणमा परेको २४ घण्टाभित्रै ती बालिकाको उद्दार गर्न सफल भएको एसपी तिम्सिनाले जानकारी दिए ।
‘हामीले आज (बिहीबार) दिउँसो सप्तकोसी नदीको पुलस्थित २६ नम्बरको ढोकाबाट फेला पारेका हौँ,’ एसपी तिम्सिना भन्छन्, ‘कुनै मानवीय क्षति हुन नदिन र घटनामा संलग्नलाई नियन्त्रणमा लिन सफल भएका छौँ ।’
बालिकाको अपहरणमा संलग्न सप्तरीको कञ्चनरूप नगरपालिका– १२ धरमपुरका ३१ वर्षीय जितुवा भनिने जितेन्द्र साह (हलुवाई)लाई पक्राउ गरिएको हो । अपहरणमा परेकी ती बालिकालाई भारततर्फ लगेको हुनसक्ने आशंकामा प्रहरीले भारतीय प्रहरीसँग समन्वय गरिरहेपनि सुनसरीतर्फ नै पर्ने सप्तकोसी पुलबाट पक्राउ गरेको एसपी तिम्सिनाले जानकारी दिए ।
खासगरी बालिका अपहरणमा परेको सूचना आएपछि प्रहरीले विभिन्न कोणबाट अनुसन्धान सुरू गरेको थियो ।
‘बालिका अपहरणमा परेको सूचना आएपछि हामीले सिसिटिभी फुटेज हेरेर खोजीलाई तीव्र बनाएका थियौँ,’ एसपी तिम्सिना भन्छन्, ‘पक्राउ परेका साहले यसअघि पनि नेपाल र भारत दुवै देशमा चोरी गर्ने र बालबालिकालाई अपहरण गर्ने प्रारम्भिक अनुसन्धानबाट देखिन्छ ।’
खासगरी साह भारतमै बसोबास गर्दै आएको प्रहरीको प्रारम्भिक अनुसन्धानबाट खुलेको छ । उनलाई बिहीबार जिल्ला अदालत सुनसरीबाट म्याद थप गरी विभिन्न कोणबाट अनुसन्धान जारी राखेको एसपी तिम्सिनाले बताए ।
Discussion about this post