इटहरी : सुनसरीको रामधुनी नगरपालिका–२ तित्रिवनस्थित पूर्व–पश्चिम राजमार्गमा बस र मोटरसाइकल ठोक्किँदा छोराको मृत्यु भएको छ भने बुबा घाइते भएका छन्।
प्रहरीका अनुसार पूर्वबाट पश्चिमतर्फ जाँदै गरेको प्रदेश १–०४–००१ प ७६१५ नम्बरको मोटरसाइकल चिप्लिएर विपरीत दिशाबाट आउँदै गरेको प्रदेश १–०१–००१ ख ४१०२ नम्बरको बसको पछाडिको भागमा ठोक्किएको थियो।
दुर्घटनामा मोटरसाइकलको पछाडि सवार रामधुनी नगरपालिका–५ का अन्दाजी २९ वर्षीय साजन गौतम गम्भीर घाइते भएका थिए। उपचारका लागि विराट टिचिङ अस्पताल लगिएकोमा उपचारकै क्रममा उनको मृत्यु भएको प्रहरीले जनाएको छ।
मोटरसाइकल चालक उनका बुबा अन्दाजी ५० वर्षीय बेदप्रसाद गौतमको बायाँ हातमा चोट लागेको छ। उनको अवस्था सामान्य रहेको प्रहरीले जनाएको छ।
दुर्घटनामा संलग्न बस, बस चालक उदयपुरको रौतामाई नगरपालिका–१ निवासी ३७ वर्षीय धीरजकुमार तामाङ तथा सवारीसाधनलाई प्रहरीले नियन्त्रणमा लिएको छ।
घटनाबारे थप अनुसन्धान भइरहेको छ।
Discussion about this post