इटहरी : सुनसरीमा लागूऔषधसहित नौ जनालाई प्रहरीले पक्राउ गरेको छ । जसमध्ये इटहरी घर भएका चार जना छन् ।
सुनसरी प्रहरीका अनुसार लागूऔषध नियन्त्रण ब्यूरो विराटनगर र इलाका प्रहरी कार्यालय लौकही सुनसरीबाट संयुक्त रूपमा खटिएको प्रहरी टोलीले जिल्ला कोशी गाउँपालिका वडा नं. १ भन्सार कार्यालय अगाडि भारतबाट नेपालतर्फ शंकास्पद रूपमा मोटरसाइकल तथा पैदल आउँदै गरेका नौ जनालाई पक्राउ गरेको हो ।
पक्राउ पर्नेमा इटहरी उपमहानगरपालिका–१६ का ३४ वर्षीय मनोजकुमार चौधरी, इटहरी–६ का २३ वर्षीय सनम तामाङ, इटहरी–२ का २७ वर्षीय निरज लिम्बू, इटहरी–२ कै २२ वर्षीय सन्दीप मगर छन् ।
चौधरीको साथबाट २७ ग्राम २ सय ७० मिलिग्राम ब्राउनसुगरजस्तो देखिने वस्तु बरामद भएको सुनसरी प्रहरीका एसपी सुमन कुमार तिम्सिनाले जानकारी दिए । यसैगरी तामाङको साथबाट २६ ग्राम ब्राउनसुगर बरामद भएको छ ।
त्यस्तै, मोटरसाइकलमा सवार लिम्बूको मलद्वारबाट ३ ग्राम ५ सय ६ मिलिग्राम बरामद भएको छ । यसैगरी, सुनसरीको रामधुनी नगरपालिका–९ का आदित्य चौधरीको साथबाट २ ग्राम १ सय मिलिग्राम बरामद भएको छ ।
स्कुटरमा सवार धरान उपमहानगरपालिका–१७ का २८ वर्षीय बेगराज लिम्बूको साथबाट ३ ग्राम १ सय ३० मिलिग्राम बरामद भएको छ । स्कुटरको पछाडि सवार धरान–१७ कै ३४ वर्षीय सागर राई पक्राउ परेका छन् ।
रामधुनी–२ का २६ वर्षीय मनिष चौधरीको साथबाट २ ग्राम ५ सय ६० मिलिग्राम र रामधुनी–५ का २६ वर्षीय विज्ञान साहको साथबाट ३५ ग्राम ८ सय ८० मिलिग्राम ब्राउनसुगरजस्तो वस्तु बरामद भएको प्रहरीले उल्लेख गरेको छ ।
पक्राउ परेकाहरू भण्टाबारी नाका हुँदै भारत पुगेर लागुऔषध खरिद गरी मोटरसाइकल, स्कुटरमा र पैदलमा नेपाल आएको खुलेको एसपी तिम्सिनाले जानकारी दिए ।
पक्राउ परेका नौ जनामाथि नै बिहीबार जिल्ला अदालत सुनसरीबाट म्याद थप गरी लागूऔषध ऐनअन्तर्गतको मुद्दामा थप अनुसन्धान भइरहेको प्रहरीले जनाएको छ ।
Discussion about this post