इटहरी : सुनसरीको दुहबीमा पिकअप भ्यान दुर्घटना हुँदा नेपाल प्रहरीका असई विरोध खतिवडाको निधन भएको छ ।
आज (शनिवार) ११ः५० बजेतिर दुहबी नगरपालिका ३ स्थित फुटानी चोक नजिकै प्रदेश २–०१–००१ च ०२५१ नम्बरको मिनी पिकअप भ्यान अनियन्त्रित भई सडकको बायाँ किनारमा ठोक्किएर दुर्घटना भएको हो ।
घटनामा गम्भीर घाइते भएका खतिवडाको मोरङको बूढीगंगास्थित विराट टिचिङ अस्पतालमा दिउँसो १२ः२१ बजे डाक्टरले मृत घोषित गरेको नेपाल राजमार्ग सुरक्षा तथा ट्राफिक व्यवस्थापन कार्यालय इटहरीका डीएसपी सन्तोष श्रेष्ठले पुष्टि गरे ।
‘भ्यान तीव्र गतिका कारण दुर्घटना भएको प्रारम्भिक अनुसन्धानबाट खुलेको छ,’ डीएसपी श्रेष्ठले टाकुरा न्यूजसँग भने, ‘दुर्घटनास्थलबाट हामीले गाडी हटाएर राजमार्ग खाली गरेका छौँ भने मृतकको शव अस्पतालमै रहेको छ ।’
भ्यान तीव्र गतिमा रहेका कारण अनियन्त्रित भएर साइडमा रहेको फलामको किनारमा ठक्कर भएको उनले जनाए ।
भ्यानमा खतिवडासहित तीन जना सवार थिए । चालक चौदण्डीगढी नगरपालिका–६ का ३८ वर्षीय सुरेश कार्की र उनकी छोरी १४ वर्षीया रोजिना कार्की सामान्य घाइते भएको र उनीहरूको थप उपचार भइरहेको छ ।
उदयपुरको त्रियुगा नगरपालिका ८ राजाबास घर भएका ३० वर्षीय घरायसी कामले विराटनगर जाँदा दुर्घटना भएको प्रारम्भिक अनुसन्धानबाट खुलेको छ ।
प्रहरी सहायक निरीक्षक (असई)खतिवडा नाराणहिटी सुरक्षा गारद गुल्म काठमाडौं दरबन्दी भई जिल्ला प्रहरी कार्यालय उदयपुरमा कार्यरत थिए ।
Discussion about this post