संखुवासभा : संखुवासभाको एक गाउँमा दाहसंस्कारको तयारी भइरहेका बेला प्रहरी पुगेपछि शव नियन्त्रणमा लिइएको छ।
मृत्युपछि कुनै औपचारिक अनुसन्धान विना शव दाहसंस्कार गर्न लागिएको भन्ने सूचनाको आधारमा प्रहरीले शव नियन्त्रणमा लिएको हो ।
दाहसंस्कार गर्न लागेका बेला संखुवासभाको भोटखोला गाउँपालिका ४ सिप्प्रङकी ६ वर्षीया बालिका युनिका तामाङको शव प्रहरीले नियन्त्रणमा लिएको हो ।
बिहीबार जिल्लाको खाँदबारी नगरपालिका–३ गुरुङचोकबाट जिल्ला प्रहरी कार्यालयका प्रहरी नायब उपरीक्षक (डीएसपी) दक्षकुमार बस्नेतको टोलीले एम्बुलेन्ससहित तामाङको शव नियन्त्रणमा लिएको हो ।
वैशाख ३० गते घरासयी विवादका क्रममा जेठाजु गोपाल तामाङ र भाइबुहारी कल्पना (गुरुङ) तामाङबीच झगडा भएको थियो । झगडाका क्रममा भाइबुहारी कल्पनाले भतिजी युनिकालाई धकेल्दा डिलबाट लडेर सख्त घाइते भएकी थिइन् ।
घाइते युनिकाको जिल्ला अस्पताल संखुवासभामा उपचारका लागि लगिएको थियो ।
तर, त्यहाँ उपचार हुन नसकेपछि थप उपचारका लागि नोबेल अस्पताल विराटनगर ल्याइएको थियो । नोबेल अस्पतलमा उपचारका क्रममा ती बालिकाको ७ जेठमा मृत्यु भएको हो ।
नियन्त्रणमा लिइएको शव जिल्ला अस्पताल संखुवासभाको शव गृहमा राखिएको छ । घटनाबारे प्रहरीले थप अनुसन्धान गरिरहेको छ ।
Discussion about this post