विराटनगर : विराटनगरमा स्रोत नखुलेको तीन लाख तीन हजारभन्दा बढी नेपाली रूपैयाँसहित एक भारतीय नागरिक पक्राउ परेका छन्।
भारतीय नम्बर प्लेटको स्कुटरमा सवार भारत बिहार राज्यको अररिया जिल्लास्थित फारबिसगञ्जका ५५ वर्षीय नन्दलाल बाहेतीलाई प्रहरीले शुक्रबार बिहान नियन्त्रणमा लिएको हो।
मोरङ प्रहरीका अनुसार जोगवनीबाट विराटनगरतर्फ आउँदै गरेको अवस्थामा विराटनगर महानगरपालिका–१७ बाट अस्थायी प्रहरी पोस्ट मटेरुवाबाट खटिएको प्रहरी टोलीले बाहेतीलाई शंकास्पद रूपमा रोकेर जाँच गरेको थियो।
असई जागेन्द्र फुयाँलको नेतृत्वमा खटिएको टोलीले बिहान करिब ११ः४५ बजे उनलाई पक्राउ गरेको हो।
प्रहरी प्रवक्ता डीएसपी कोपिला चुँडालका अनुसार शरीर खानतलासी गर्दा बाहेतीले पाइन्टको भित्री भागमा लुकाइछिपाइ राखेको अवस्थामा स्रोत नखुलेको नगद रकम फेला परेको हो।
बरामद रकममा १ हजार दरका ३ सय थान, ५ सय दरका ४ थान र १ सय दरका ११ थान नोट रहेका छन्।
बरामद गरिएको ३ लाख ३ हजार १ सय रुपैयाँ र बीआर ३८ एए ८३०६ नम्बरको भारतीय स्कुटरसहित बाहेतीलाई नियन्त्रणमा लिएर इलाका प्रहरी कार्यालय रानीमा राखिएको छ।
प्रहरीका अनुसार रकमको स्रोत खुलाउन नसकेपछि घटनालाई अवैध हुण्डी कारोबारसँग जोडेर अनुसन्धान अघि बढाइएको छ।
Discussion about this post