इटहरी : स्व. कृष्ण प्रसाद भट्टराई स्मृति गोल्डकपको तेस्रो संस्करण अन्तर्गतको फाइनल खेलमा लोहोरुङ फुटबल क्लबमाथि १–० गोलअन्तरले जित निकाल्दै उदयपुरको बसाह क्लबले उपाधि चुमेको छ ।
इटहरीस्थित जनता बहुमुखी क्याम्पसको खेलमैदानमा आइतबार सम्पन्न भएको फाइनल खेलमा बसाहलाई उपाधि जिताउन कप्तान रितेश तामाङले गोल गरे ।
प्रतिस्पर्धात्मक खेलको पहिलो हाफमा गोल गर्न नसकेको बसाहको लागि तामाङले दोस्रो हाफको २६ औं मिनेटमा गरेको गोल नै निर्णायक बन्यो ।
यससँगै विजेता टिम बसाहले ४ लाख ४ हजार रुपैयाँ नगद पुरस्कार पाएको छ । उपविजेता लोहोरुङले २ लाख २ हजार २ सय रुपैयाँमा चित्त बुझाएको छ ।
खेलमा लोहोरुङका मिलन लिम्बू म्यान अफ दि म्याच घोषित हुँदै ५ हजार ५ सय रुपैयाा नगद र मेडल प्राप्त गर्न सफल भए ।
प्रतियोगिताको सर्वोत्कृष्ट खेलाडी र सर्वाधिक गोलकर्ता रितेश तामाङ घोषित भए । उनले सर्वोत्कृष्ट खेलाडी भएबापत नगद २० हजार र सर्वाधिक गोलकर्ता भएबापत नगद १३ हजार पुरस्कार पाए ।
बसाहका सन्दीप भट्टराई उत्कृष्ट गोलकिपर, मञ्जिल खड्का उत्कृष्ट डिफेन्स र केशव राई उत्कृष्ट प्रशिक्षक घोषित भए । लोहोरुङका विवेक राई उत्कृष्ट मिडफिल्डर भए भने आयोजक द योङ ब्रदर्श क्लबका सविन घिमिरे उदयमान खेलाडी घोषित भए ।
विधागत उत्कृष्ट सबैले जनही १३–१३ हजार रुपैयाँ पुरस्कार पाए ।
यही ३० फागुनदेखि सुरु भएको प्रतियोगितामा १ भारतीयसहित ८ टिमको सहभागिता रहेको आयोजक द योङ ब्रदर्श क्लबका अध्यक्ष विजय लिम्बूले बताए ।
Discussion about this post