धनकुटा : धनकुटाको धनकुटा–हिले सडकखण्डमा मंगलबार दुई मोटरसाइकल एकापसमा ठोक्किँदा एक जनाको मृत्यु भएको छ भने अर्का एक जना घाइते भएका छन्।
जिल्ला प्रहरी कार्यालय धनकुटाका अनुसार बिहान करिब ७ः१५ बजेतिर धनकुटा नगरपालिका–४ च्यानेमा धनकुटाबाट हिलेतर्फ जाँदै गरेको को १२ प ८०९८ नम्बरको मोटरसाइकल र विपरीत दिशाबाट आउँदै गरेको को २५ प १७७ नम्बरको मोटरसाइकल ओभरस्पिड तथा ओभरटेक गर्ने क्रममा एकापसमा ठोक्किएका हुन्।
दुर्घटनामा गम्भीर घाइते भएका रामधुनी नगरपालिका–९, झुम्का घर भई हाल धनकुटा–७ मा बस्दै आएका ५५ वर्षीय विशाल चौधरीको जिल्ला अस्पताल धनकुटामा उपचारका क्रममा मृत्यु भएको प्रहरीले जनाएको छ।
चौधरी धनकुटामा फर्निचर व्यवसाय सञ्चालन गर्दै आएका थिए।
दुर्घटनामा घाइते भएका धनकुटा नगरपालिका–१ हिलेका स्याम तामाङलाई प्रारम्भिक उपचारपछि थप उपचारका लागि बीपी कोइराला स्वास्थ्य विज्ञान प्रतिष्ठान, धरान ल्याइएको छ। तामाङ जिल्ला अस्पताल धनकुटाको डायलाइसिस वार्डमा कार्यरत कर्मचारी हुन्।
प्रहरीका अनुसार दुर्घटनालगत्तै धनकुटास्थित श्री भीमदल गणको टोली पीटी दौडका क्रममा घटनास्थल पुगेपछि दुवै घाइतेको उद्धार गरी अस्पताल पुर्याएको थियो।
मृतक चौधरीको शव पोस्टमार्टमका लागि जिल्ला अस्पताल धनकुटामा राखिएको छ। घटनाबारे थप अनुसन्धान भइरहेको जिल्ला प्रहरी कार्यालय धनकुटाले जनाएको छ।
Discussion about this post