जिल्ला अस्पतालमा चिकित्सक नभेटिएपछि उपचारबिनै घर फर्किन बाध्य बिरामी

उदयपुर : उदयपुरको सदरमुकाम गाईघाटस्थित जिल्ला अस्पताल उदयपुरमा चिकित्सक नभेटिएपछि उपचारका लागि आएका चार दर्जनभन्दा बढी बिरामी उपचारबिनै घर फर्कन बाध्य भएका छन्।

बिहीबार अस्पतालको बहिरङ्ग सेवा (ओपिडी) मा उपचार गराउन पुगेका बिरामीले सम्बन्धित चिकित्सक नभेटेपछि उपचार नपाएको गुनासो गरेका हुन्। सरकारी नियमअनुसार दशैँको बिदा सप्तमी तिथिदेखि सुरु हुने भए पनि चिकित्सकहरू बिदा सुरु हुनुअगावै अस्पतालमा अनुपस्थित रहेको बिरामीहरूको भनाइ छ।

अस्पतालमा दिनहुँ सयौँ बिरामी उपचारका लागि आउने गरेका छन्। तर, बिहीबार ओपिडीको पुर्जा लिएर लामो समयसम्म पालो कुरेका बिरामीसमेत उपचार नपाई फर्कनुपरेको थियो।

छालासम्बन्धी समस्या लिएर अस्पताल पुगेका त्रियुगा नगरपालिका–१२ का गोपालकृष्ण तिम्सिनाले दुई घण्टासम्म लाइनमा बसे पनि उपचार नपाएको बताए।

“बिहान ८ बजे नै अस्पताल पुगेर पहिलो नम्बरको ओपिडीको पुर्जा लिएँ। लाइनमा बस्दा करिब साढे १० बजे पालो आयो, तर ओपिडीमा चिकित्सक हुनुहुन्नथ्यो,” तिम्सिनाले भने, “भित्र रहेका एक मेडिकल अधिकृतले आज डाक्टर बिदामा हुनुहुन्छ, तपाईंको समस्या बाहिरको क्लिनिकमा देखाउनु भनेपछि घर फर्किएँ।”

अस्पतालको ओपिडीबाटै बाहिरको क्लिनिकमा जान सुझाव दिइएपछि आफूहरू अन्योलमा परेको उनले बताए। सरकारी अस्पतालमा उपचार गराउन आएका बिरामीलाई चिकित्सकको अनुपस्थितिका कारण निजी क्लिनिक जानुपर्ने अवस्था उचित नभएको उनको भनाइ छ।

अस्पताल प्रशासनका अनुसार पहिलो नम्बरको ओपिडीमा बिरामीको स्वास्थ्य परीक्षण गर्दै आएका एमडिजिपी चिकित्सक डा. रन्दीप राउत बिदामा रहेका कारण समस्या उत्पन्न भएको हो।

जिल्ला अस्पतालका निमित्त मेडिकल सुपरिटेन्डेन्ट सन्तोष राईले चिकित्सक बिदामा रहेका कारण बिरामीलाई समस्या भएको स्वीकार गरे। उनले अस्पतालमा सधैँ सबै विशेषज्ञ सेवा उपलब्ध गराउन नसकिने बताउँदै डा. राउतको स्थानमा मेडिकल अधिकृत खटाइएको जानकारी दिए।

“पुर्जा वितरण गर्ने कर्मचारीलाई चिकित्सक हुनुहुन्छ वा हुनुहुन्न भन्ने जानकारी नभएकाले समस्या भएको हो,” राईले भने, “अब पुर्जा वितरण काउन्टरका कर्मचारीलाई चिकित्सकको उपलब्धताबारे जानकारी दिने व्यवस्था मिलाउँछौँ। आगामी दिनमा यस्तो समस्या नदोहोरियोस् भनेर सचेत रहनेछौँ।”

जिल्ला अस्पतालमा चिकित्सकको दरबन्दी १४ जना रहेको भए पनि बिरामीले सहज रूपमा सेवा पाउन नसकेको गुनासो गर्दै आएका छन्। अस्पताल प्रशासनले आवश्यक सामग्री उपलब्ध नगराउने, सेवा–सुविधा समयमा नपाउने तथा स्रोतसाधनको अभाव हुने गरेको चिकित्सकहरूको गुनासो छ। यस्ता समस्याका कारण विगतमा पनि अस्पतालको सेवा प्रभावित हुँदै आएको अस्पताल स्रोतले जनाएको छ।

अस्पतालमा आवश्यक उपकरण र पूर्वाधारको अभावसमेत रहेको बताइएको छ। गत आर्थिक वर्षमा इन्डोस्कोपी मेसिन र जेनेरेटर खरिदका लागि कोशी प्रदेश सरकारले विनियोजन गरेको रकम खर्च हुन नसकी फ्रिज भएको थियो।

अस्पतालमा आर्थिक समस्या र आवश्यक स्रोतसाधनको अभाव रहेको बताइए पनि ती समस्या समाधानका लागि प्रशासनले पर्याप्त चासो नदिएको स्रोतको दाबी छ। यसको प्रत्यक्ष असर उपचारका लागि अस्पताल पुग्ने सर्वसाधारण बिरामीमा परेको छ।

सरकारी अस्पतालमा चिकित्सकको उपलब्धता सुनिश्चित गर्नु, बिरामीलाई सेवा प्रवाहबारे सही जानकारी दिनु र उपलब्ध जनशक्तिको प्रभावकारी व्यवस्थापन गर्नु आवश्यक देखिएको छ।