विराटनगर : जेनजी आन्दोलनका क्रममा विराटनगरमा भएको आगजनी तथा तोडफोड घटनामा अभियुक्त रहेका ताजिम अन्सारी लामो समय सम्पर्कविहीन रहेपछि शुक्रबार आफैं जिल्ला अदालत मोरङमा उपस्थित भएका छन्।
अदालतले उनीविरुद्ध दर्ता भएको एक मुद्दामा थुनामै राखेर पुर्पक्ष गर्न आदेश दिएपछि उनलाई जिल्ला कारागार मोरङ पठाइएको छ।
जिल्ला अदालत मोरङका न्यायाधीश चित्रबहादुर गुरुङको इजलासले विराटनगरस्थित नापी कार्यालयमा भएको आगजनी तथा तोडफोडसम्बन्धी आपराधिक उपद्रव मुद्दामा अन्सारीलाई थुनामा राखेर मुद्दाको पुर्पक्ष गर्न आदेश दिएको अदालतका सूचना अधिकारी हेमबहादुर बुढाथोकीले जानकारी दिए।
उनीविरुद्ध जिल्ला सरकारी वकिल कार्यालयमा भएको तोडफोडसम्बन्धी अर्को मुद्दामा भने अदालतले तीन लाख रुपैयाँ धरौटीमा रिहा गर्न आदेश गरेको छ। तर धरौटी रकम हालसम्म दाखिला नभएकाले उनी कारागारमै रहने भएका छन्।
अन्सारी यसअघि सोही घटनामा पक्राउ परेपछि हाजिरजमानीमा रिहा भएका थिए।
त्यसपछि नियमित रूपमा अदालतमा उपस्थित नभएपछि उनी फरार प्रतिवादीका रूपमा सूचीकृत भएका थिए। पक्राउ पुर्जी जारी भए पनि उनी लामो समय प्रहरी र अदालतको सम्पर्कमा आएका थिएनन्।
२०८२ भदौ २४ गते जेनजी आन्दोलनका क्रममा विराटनगरमा विभिन्न सरकारी कार्यालय, सार्वजनिक संरचना तथा निजी प्रतिष्ठानमा आगजनी, तोडफोड र लुटपाट भएको थियो।
घटनापछि प्रहरीले अनुसन्धानका आधारमा अन्सारीसहित अन्य व्यक्तिविरुद्ध आपराधिक उपद्रवसम्बन्धी मुद्दा दर्ता गरेको थियो।
अनुसन्धानका क्रममा पक्राउ परेका अन्सारी र अन्य केही अभियुक्त हाजिरजमानीमा छुटेका थिए। तर अदालतको आदेशअनुसार नियमित उपस्थित नहुँदा उनीहरूविरुद्धको कानुनी प्रक्रिया फरार प्रतिवादीका रूपमा अघि बढाइएको थियो।
शुक्रबार स्वयं अदालतमा उपस्थित भएपछि भएको थुनछेक बहसपछि अदालतले एउटा मुद्दामा थुनामै राखेर पुर्पक्ष गर्न आदेश दिएको हो।
Discussion about this post