इटहरी : उद्योग वाणिज्य संघ (उवासंघ) इटहरीको नयाँ नेतृत्व चयनका लागि शनिबार सम्पन्न निर्वाचनमा कुल एक हजार ५४३ मत खसेको छ।
कुल दुई हजार ३६९ मतदाता रहेको निर्वाचनमा करिब ६५ प्रतिशत मतदान भएको निर्वाचन समितिले जनाएको छ।
मतगणना आइतबार बिहानदेखि सुरु गर्ने तयारी गरिएको छ।
अध्यक्षसहित १९ जनाको नयाँ कार्यसमिति चयनका लागि भएको निर्वाचनमा सहभागी व्यवसायीहरूले नयाँ नेतृत्वले निर्वाचन जित्नेभन्दा पनि व्यवसायीका साझा समस्या समाधानलाई प्राथमिकतामा राख्नुपर्ने बताएका छन्।
उनीहरूले इटहरीमा लामो समयदेखि विवादको विषय बन्दै आएको बिहीबार र शनिबारको साप्ताहिक बजार बन्दलाई एकरूपता दिने, घरबहाल कर तथा स्थानीय करमा सहुलियतको व्यवस्था गर्ने र व्यवसाय सञ्चालनको वातावरण सहज बनाउने काममा नेतृत्वले प्रभावकारी भूमिका खेल्नुपर्ने धारणा राखेका छन्।
त्यसैगरी, दीर्घकालीन पार्किङ व्यवस्थापन, बजारको व्यवस्थित विकास, डिजिटल कारोबारको प्रवर्द्धन तथा व्यवसायलाई प्रविधिमैत्री बनाउने विषयलाई पनि नयाँ नेतृत्वको प्राथमिकतामा राख्नुपर्ने व्यवसायीहरूको अपेक्षा छ।
निर्वाचनको अन्तिम नतिजा आइतबार सार्वजनिक हुने निर्वाचन समितिको तयारी छ। अध्यक्षका लागि नवराज काफले र गायत्री कटवाल भण्डारी प्रतिस्पर्धामा छन्।
Discussion about this post