इटहरी : इटहरीमा प्रहरीले लागूऔषधसहित दुई युवकलाई पक्राउ गरेको छ।
बुधबार साँझ करिब ६ बजेतिर इटहरी उपमहानगरपालिका–२ डम्फुचोकमा लागूऔषध बिक्री वितरण भइरहेको भन्ने गोप्य सूचनाका आधारमा कोशी प्रदेश प्रहरी कार्यालय विराटनगर र सामुदायिक प्रहरी बिट हलगडाबाट खटिएको संयुक्त प्रहरी टोलीले उनीहरूलाई पक्राउ गरेको हो।
प्रहरीका अनुसार प्रदेश ०१–०३–०४७ प ११०८ नम्बरको मोटरसाइकल रोकेर बसिरहेका धनकुटाको सहिदभूमि गाउँपालिका–३ घर भई हाल इटहरी–२ बस्ने २२ वर्षीय उज्वल राई र इटहरी–४ बस्ने २१ वर्षीय सविन मगरलाई शंका लागेपछि खानतलासी गरिएको थियो।
खानतलासीका क्रममा उनीहरूको साथबाट ट्रामाडोल ६१० क्याप्सुल र डिसिक्लोमाइन ६१० ट्याब्लेट बरामद भएको प्रहरीले जनाएको छ।
प्रहरीले बरामद लागूऔषध र मोटरसाइकलसहित दुवै जनालाई नियन्त्रणमा लिएर थप अनुसन्धान भइरहेको प्रहरीको भनाइ छ।
Discussion about this post