विराटनगर : विराट सुपर लिगको उपाधि बिराट र्याप्टर्सले जितेको छ । बिहीबार भएको रोमाञ्चक फाइनलमा र्याप्टर्सले पेनाल्टी सुटआउटमा ९औँ ब्याचलाई ४–३ गोलले पराजित गर्दै उपाधि जितेको हो ।
निर्धारित समयमा दुवै टोलीबीच निर्णायक नतिजा ननिस्किएपछि खेल पेनाल्टी सुटआउटमा पुगेको थियो । सुटआउटमा उत्कृष्ट प्रदर्शन गरेको र्याप्टर्सले एक गोलको अन्तरले जित निकाल्यो । लिग चरणका सबै खेलमा अपराजित रहेको र्याप्टर्सले अघिल्लो संस्करणको फाइनलमा व्यहोरेको हारको बदला लिँदै उपाधि उचालेको हो ।
उपाधिसँगै र्याप्टर्सले नगद ४० हजार रुपैयाँ र ट्रफी प्राप्त गरेको छ । उपविजेता ९औँ ब्याचले २० हजार रुपैयाँ, प्रमाणपत्र र मेडल पाउँदा तेस्रो भएको बिराट एलिट युनाइटेडले १० हजार रुपैयाँ र प्रमाणपत्र प्राप्त गरेको छ ।
प्रतियोगितामा निश्चल विक उत्कृष्ट खेलाडी र अनुप कटवाल उत्कृष्ट गोलकिपर घोषित भए ।
भदौ १७ गतेदेखि सुरु भएको प्रतियोगितामा बिराट मेडिकल कलेज टिचिङ हस्पिटलमा कार्यरत चिकित्सक, कर्मचारी तथा अध्ययनरत विद्यार्थीका सात टोली सहभागी थिए । लिग चरणका खेलमा अपराजित रहँदै र्याप्टर्स फाइनलमा पुगेको थियो ।
विजेता टोलीका कप्तान प्रमेशराज देवकोटाले अघिल्लो संस्करणको फाइनलमा व्यहोरेको पराजयलाई जितमा बदल्ने लक्ष्यसहित उच्च मनोबलका साथ मैदानमा उत्रिएको बताए । त्यसैले उपाधि जित्न सहज भएको उनको भनाइ थियो ।
बिराट मेडिकल कलेज टिचिङ हस्पिटलले चिकित्सक, कर्मचारी र विद्यार्थीको स्वास्थ्य तथा शारीरिक तन्दुरुस्तीमा ध्यान दिँदै खेलकुदलाई दैनिक जीवनसँग जोड्ने उद्देश्यले हरेक वर्ष तीन प्रतियोगिता आयोजना गर्दै आएको छ । आपसी सद्भाव र टोलीभावना अभिवृद्धिमा खेलकुदले सहयोग पुर्याउने विश्वाससहित अस्पतालले यस्ता प्रतियोगितालाई निरन्तरता दिने जनाएको छ ।
यस वर्ष बिराट फुटसल लिग, बिराट च्याम्पियन लिग र बिराट सुपर लिग सम्पन्न भएका छन् ।
Discussion about this post