इटहरीमा गुञ्जिए नवराज पराजुली

इटहरी । इटहरीमा कवि नवराज पराजुली गुञ्जिएका छन् ।
प्रणय दिवसको अवसर पारेर शुक्रबार लियो क्लब इटहरीले पराजुलीको एकल वाचन राखेको हो । पराजुलीले प्रेम कविता सुनाएका थिए । उनले आधा दर्जन बढी कविता सुनाए । पराजुलीका प्रत्येक कविताले वाहवाही पाएको थियो ।
कवि पराजुलीलाई संगीतकार रञ्जन गायकले बाँसुरी र सांरगी बजाएर साथ दिएका थिए ।
लियो क्लबका पूर्व अध्यक्ष युवराज काफ्लेले साहित्यलाई लियो क्लबले प्राथमिकतामा राख्दै आएको बताए । काफ्लेले आफूँले कवितालाई परिभाषित गर्न कहिल्यै नसकेको र कविताले जीवनलाई नै परिभाषित गर्ने गरेको तर्क गरे ।
लियो क्लब इटहरीका अध्यक्ष चिरञ्जीवि कार्की (विपिन) को सभाध्यक्षमा भएको कार्यक्रममा कवि मनु मञ्जिल प्रमुख अतिथि रहेका थिए । उनले कार्यक्रममा बोल्दै शब्दहरु हल्का हुने तर त्यसलाई प्रयोग गर्ने कला कवितामा भेटिने तर्क गरे । उनले भने, मलाई पराजुलीका कविताले मुक्त पारेकाले म उनको प्रसंसक हुँ ।
आभाष भट्टराईको संयोजकत्वमा भएको कार्यक्रममा सयौँ दर्शकको उपस्थिति रहेको थियो ।