इटहरी : नेकपा एकीकृत समाजवादीका बरिष्ठ नेता झलनाथ खनालले बैशाख ३० गतेपछि ओली गुटको समाप्त हुने बताएका छन् ।
सोमबार लोकतान्त्रित गठबन्धनले इटहरीमा आयोजना गरेको चुनावी सभालाई सम्बोधन गर्दै खनालले ३० गतेपछि ओली गुटको समाप्त हुने बताएका हुन् ।
उनले संविधान निर्माणमा पनि सबै दलहरू एक भएको स्मरण गर्दै अहिले बनेको गठबन्धन संविधान रक्षाका लागि भएको तर्क राखे ।
‘अब गठबन्धन विजयीको बाटोमा अगाडि बढिसकेको छ, हामी केपी शर्मा ओली गुटलाई पराजित गर्दैछौँ,’ पूर्व प्रधानमन्त्री समेत रहेका खनालले भने, ‘३० गतेपछि केपी गुटको समाप्त हुँदैछ ।’
उनले इटहरीमा गठबन्धनको सरकारले विजयी हुने निश्चित जस्तै भएको दाबी गरे ।
उनले नेकपा एमालेका अध्यक्ष केपी शर्मा ओलीप्रति इङ्गित गर्दै भने, ‘केपी ओली नेतृत्वमा रहेको गुटलाई हामी पराजित गर्दैछौँ, अोलीले गरेका असंवैधानिक गतिविधिहरू तपाईँलाई थाहै छ ।’
ओलीले देशमा संविधानविपरीत कार्य पटकपटक गरेपनि आफूहरूले सम्झाउदा अहंकारको बाटोमा अगाडि बढेको उनले बताए ।
उनले देशका ठूला परिवर्तनहरूमा देशका शीर्ष दलहरू एकैठाउँमा उभिएको तर्क राख्दै अहिलेको गठबन्धन पनि देश निर्माणकै लागि बनेको बताए ।
सबै राजनीतिक शक्तिहरू एकताबद्व भएको उनको भनाइ छ ।
यही बैशाख ३० गते हुने स्थानीय तहको निर्वाचनमा इटहरी उपमहानगरपालिकामा गठबन्धनको तर्फबाट मेयरमा नेपाली कांग्रेसका उम्मेदवार हेमकर्ण पौडेल र नेकपा एकीकृत समाजवादीबाट उपमेयरमा केशवकुमार विष्ट चुनावी मैदानमा छन् ।
भिडियो
Discussion about this post