इटहरी : भोजपुरको रामप्रसादराई गाउँपालिका ५ मानेभञ्ज्याङका मीन बहादुर थापाले थाइल्याण्ड जानका लागि इटहरीमा सञ्चालित रोयल पाण्डा एजुकेशन कन्सल्टेन्सीमा दुई लाख ७० हजार रुपैँया बुझाए ।
उनले आँफूले उक्त रकम बुझाएसँगै विदेश गएर परिवारलाई सुखी जीवनयापन बिताउनका लागि सुनौलो सपना बुनेका थिए । तर, उनको सपना साकार हुनु अगावै भत्किएको छ ।
‘गत ४ तारिकमा थाइल्याण्ड जानका लागि रकम बुझाएको थिएँ, तर त्यसको दुईदिनपछि सञ्चालकहरु बेपत्ता भएपछि यतिबेला यता न उता भएको छु,’ उनले टाकुरासँग भने, ‘थाइल्याण्डमा राम्रो कमाइ हुने र राम्रै काममा लगाइदिने आश्वासन पाएसँगै पैसा बुझाएको थिएँ, विदेश गएर परिवारलाई सहज जीवन निर्वाहका लागि केही पैसा कमाउने सपना भत्किएको छ ।’
उनी एक प्रतिनिधि पात्र मात्र हुन् । उनी जस्तै उक्त कन्सल्टेन्सीबाट ठगिएका तीन दर्जन बढी युवाहरु छन् । उनीहरुले बुधबार इटहरी ६ मा रहेको रोयल पाण्डा कन्सल्टेन्सी अगाडि भेला भएर सञ्चारकर्मीसँग आफ्ना समस्या राख्दै आक्रोशित भएका छन् ।
सञ्चालकद्धय दीपकप्रसाद ढुंगेल र विशाल आचार्यले ३७ जना युवाहरुबाट एक करोड २६ लाख रुपैँया रकम उठाएर हाल बेपत्ता भएकाले पीडितहरु आक्रोशित भएका हुन् ।
इटहरी १८ का लक्ष्मण कुमार चौधरीले भने आफूलाई दुवहीमा राम्रो कम्पनीमा काम लगाइदिने भन्दै कन्सल्टेन्सीले दुई लाख ६५ हजार रुपैँया लिएको थियो । उनले अघिल्लो महिनाको १ र २ तारिक गरी उक्त रकम बुझाएका थिए । तर, ६ तारिकदेखि सञ्चालकद्धय ढुंगेल र आचार्य फरार भएपछि आँफू समस्यामा रहेको सुनाए ।
भने, ‘विदेश पठाइदिने र राम्रो काम लगाइदिने भन्दै आश्वासन दिएका मानिसहरु अहिले सम्पर्कबिहीन हुँदा समस्या आइपरेको छ ।’
इटहरी ९ कै रोनिस चौधरीले पनि फ्रान्स जानका लागि दुई लाख रुपैँया बुझाएपनि अहिले आँफू अलपत्र अवस्थामा पुगेको बताए ।
उनले भने, ‘सुरुमा डकुमेन्ट फरवार्ड गर्नका लागि अग्रिम दुई लाख रुपैँया माग गरिएको थियो, जम्मा दश लाख लागत लाग्ने भनेको थियो ।’ उनका अनुसार कन्सल्टेन्सीले फ्रान्स पठाइदिने र राम्रो कामको ग्यारेण्टी लिएको थियो । तर, अहिले उनीहरु बेपत्ता हुँदा समस्याले च्यापेको चौधरीको भनाइ थियो ।
इटहरी ५ का शक्तिमान तामाङले आँफूले ऋण गरेर रकम बुझाएपनि अहिले विदेश जान नपाउँदा ब्याज तिर्न समेत समस्या रहेको उल्लेख गरे । उनले टाकुरासँग भने, ‘ऋण खोजेर बुझाएको रकमको अहिले ब्याज समेत तिर्न नसक्दा बिचल्ली भएको छ, फ्रान्सका लागि डकुमेन्ट पेश गरेको भएपनि अहिले घर न घाटको अवस्था भयो ।’
उनले पीडकलाई कडा भन्दा कडा कारबाही हुनुपर्ने माग राखेका छन् । इटहरीमा बुधबार करीब दुई दर्जन युवाहरुले सञ्चालकलाई कुनै पनि हालतमा कारबाही हुनुपर्ने र आफ्नो पैसा फिर्ता हुनुपर्ने माग राखेका थिए ।
उनीहरुले केही दिन अगाडि मात्रै जिल्ला प्रशासन कार्यालय सुनसरी र श्रम कार्यालय विराटनगरमा उजुरी समेत गरेका थिए । पछिल्लो समय विभिन्न बहानामा ठगी गर्ने गिरोहको संख्या सक्रिय रहेपनि सम्बन्धित निकाय मौन रहेका छन् ।
उक्त कन्सल्टेन्सीले यूईए मात्रै नभई युरोपियन मुलुकमा पठाउने भन्दै विभिन्न प्रलोभन देखाएर युवाहरुसँग रकम उठाउँदै आएको पीडितहरुले बताएका छन् । इटहरी उपमहानगरपालिकामा २२२०५०/२०७६/२०७७ मा दर्ता भई पान नम्बर ६१२४८९१७ समेत लिएको कन्सल्टेन्सीले ठगी गर्नकै लागि मात्रै संस्था दर्ता गरेको हुनसक्ने आशंका गरिएको छ ।
Discussion about this post