इटहरी : नेपाली कांग्रेस सुनसरीका सभापति तथा प्रदेश १ का संसदीय दलका नेता राजीव कोइरालाले कुनैपनि बेला प्रदेश सरकार ढल्ने बताएका छन् ।
सोमबार ट्रेड युनियन कांग्रेस इटहरीले आयोजना गरेको शुभकामना आदानप्रदान कार्यक्रममा सम्बोधन गर्दै कोइरालाले कुनै पनि समयमा प्रदेश १ सरकार ढल्न सक्ने बताएका हुन् ।
उनले भने, ‘बाहिर देख्दा जति बलियो देखिएपनि भित्र असाध्यै कमजोर अवस्थामा छ, कुनैपनि बेला प्रदेश सरकार ढल्न सक्छ ।’
कांग्रेस सरकारमा जान आतुर नभएपनि व्यवस्था बचाउनका लागि कांग्रेसको विकल्प नरहेको उनले बताए ।
कोइरालाले भने, ‘आइपरेको अवस्थामा कांग्रेस सरकारमा जानपनि तयार हुनुपर्छ, हामी जिम्मेवारीबाट पछि हट्दैनौँ । कम्युनिष्ट नेतृत्वले व्यवस्था धरापमा परेको अवस्था छ ।’
लोकतान्त्रिक अभ्यासलाई व्यवस्थित गर्न जनताले लोकतान्त्रिक दललाई नै अभिमत दिएमा मात्र मुलकमा राजनीतिक स्थिरता र समृद्धको बाटोतर्फ अघि बढ्ने उनको तर्क थियो । ‘लोकतान्त्रिक व्यवस्थामा अभ्यस्त हुँदै गरेका कम्युनिष्टले दुइतिहाई पाएपछि देश दुर्घटनाको अवस्थामा पुगेको छ,’ उनले भने ।
कोरोनाले थलिएको समयमा वर्तमान प्रधानमन्त्री केपीशर्मा ओलीले संसद विघटन गरेर मुलुकमा राजनीतिक तरंग उत्पन्न भएको भन्दै कोइरालाले ‘तीते करेलामाथि नीम’ को संज्ञा दिए ।
कार्यक्रममा १ नं. प्रदेशसभाका प्रमुख सचेतक केदार कार्कीले राजनीति गर्ने मानिसले जनताका लागि समपर्ण र त्याग गर्न आवश्यक रहेको उदृत गरे ।
मुलुकमा त्याग र समपर्ण नभएका कारण पछिल्लो समय भ्रष्टाचारका घटना पनि बढेको उनले बताए । श्रमको उचित सम्मान नभएसम्म राष्ट्र निर्माण नहुने उनको तर्क थियो ।
ट्रेड युनियन इटहरीका अध्यक्ष गोकुल थापाको सभाध्यक्षमा सम्पन्न कार्यक्रममा नेपाल शिक्षक संघका केन्द्रीय सदस्य बलराम भट्टराई, नेपाल नाई संघ सुनसरी अध्यक्ष माधव चौधरी, नेविसंघ सुनसरी अध्यक्ष मन्दिप भट्टराई, नेपाली कांग्रेस इटहरी सहसभापती कोबितजंग कार्की, कांग्रेस सुनसरी सचिव केदार भन्डारी, कांग्रेस नेतृ बिमला ढकाल, प्रदेश सांसद ज्योति सुब्बा लगायतले बोलेका थिए ।
Discussion about this post